POWr Social Media Icons

Friday, February 13, 2015

 የቀብር ማስፈጸሚያ የመድን ሽፋን አገልግሎት ተጀመረ
የኢትዮጵያ መድን ድርጅት የቀብር ማስፈጸሚያ የመድን ሽፋን አገልግሎት ለመጀመሪያ ጊዜ ለደንበኞቹ መስጠት መጀመሩን አስታወቀ።
የድርጅቱ ዋና ስራ አስፈጻሚ አቶ የወንድወሰን ኢተፋ እንደገለጹት፥ አገልግሎቱ የሰው ሞትን ተከትሎ የሚመጡና  የቀብር ማስፈጸሚያ ወጪዎችን በተሟላ ሁኔታ የሚሸፍን የዋስትና አይነት ነው።
ሽፋኑ በእድር ላልታቀፉ ዜጎች አገልግሎት እንዲሰጥ ተደርጎ የተዘጋጀ ነው ያሉት ስራ አስፈጻሚው ፥ እየናረ የመጣውን የቀብር ማስፈጸሚያ ወጪን ለመሸፈን ከእድሮች ጋር በመቀናጀት የሚሰራ መሆኑንም አመልክተዋል።
ድርጅቱ በመላው አገሪቱ በሚሰጠው አገልግሎት ከአንድ ትሪሊዮን ብር በላይ ለሆነ ንብረት የመድን ሽፋን መስጠቱን አመልክተዋል።
በደንበኞቹ ንብረትና ህይወት ላይ ለደረሰ ጉዳትና ከሶስተኛ ወገን ለቀረበባቸው ህጋዊ ኃላፊነት 6 ነጥብ 6 ቢሊዮን ብር የካሳ ክፍያ በመፈጸም አጋርነቱን እያረጋገጠ እንደሚገኝም ጠቁመዋል።
የተዘጋጀው የመድን ሽፋን ዕድሜ፣ ጾታ፣ ሃይማኖት ሳይለይና የጤንነት ሁኔታን ሳይጠይቅ  ለሁሉም ዜጎች የሚያገለግል ሲሆን፥ በተጨማሪ በተለያዩ አገራት ለሚገኙ ሽፋኑን ለገዙ ዜጎች የመድን ዋስትና ለመስጠት የሚያስችል መሆኑን አመልክተዋል።
የኢትዮጵያ መድን ድርጅት ከተቋቋመ 39 ዓመታትን ያስቆጠረ ሲሆን በመላው አገሪቱ በሚገኙ 66 ቅርንጫፎቹ የተለያዩ የመድን ሽፋን አገልግሎቶች እየሰጠ ይገኛል።
ምንጭ፦ኤፍ.ቢ.ሲ

0 comments :