በስምንት ምድብ የተከፈሉ 32 ዩኒቨርስቲዎች በሚፎካከሩበት የእግር ኳስ ውድድር ሀዋሳ ከምድቡ አምስት ነጥብ በመያዝ በቀዳሚነት አላፊ ሆነ

ሰባተኛ ቀኑን የያዘው የመንግሥት ዩኒቨርስቲዎች 8ኛው የስፖርት ፌስቲቫል በዙር የማጣሪያና የፍፃሜ ውድድሮች በአጓጊነቱ እንደቀጠለ ነው።

በ13 የስፖርት ዓይነቶች ከ7 ሺህ በላይ ተወዳዳሪዎች የታደሙበት ፌስቲቫሉ ያሳየው ስፖርታዊ ጨዋነት አሁንም እንደተጠበቀ ይገኛል።

ትናንት የተጀመረው የውኃ ዋና ስፖርት በወንጂ የመከላከያ ሠራዊት የአዳማ ጋርመንት ፋውንዴሽን መዋኛ ሥፍራ ተጀምሯል።

የ1 ሺህ 500 ሜትር የነፃ ቀዘፋ የመክፈቻ የፍጻሜ ውድድር ሆኖ ድሬዳዋና አክሱም የመጀመሪያውን የወርቅ ሜዳሊያ አግኝተውበታል።

መቐለ በወንድ የብር፣ አክሱም ደግሞ የነሐስ ሜዳሊያ አሸናፊ ሲሆኑ፥ ባህርዳርና ወሎ ዩኒቨርስቲዎች የብርና የነሐስ ሜዳሊያ በቅደም ተከተል ለግላቸው አድርገዋል።

በስምንት ምድብ የተከፈሉ 32 ዩኒቨርስቲዎች የሚፎካከሩበት የእግር ኳስ ውድድርም ሀዋሳ ከምድቡ አምስት ነጥብ በመያዝ በቀዳሚነት አላፊ መሆኑን አረጋግጧል።

የመምና የሜዳ ውድድሮች እንደሚደረጉበት በሚጠበቀው አትሌቲክስም ዛሬ በሴቶች የጦር ውርወራ የፍጻሜ ውድድር ይካሄዳል።

የ1 ሺህ 500፣ የ400 እና የ100 ሜትር የአጭር ርቀት የማጣሪያ ውድድሮች ዛሬ በሁለቱም ጾታዎች ይከናወናሉ።

የቅርጫት፣ የመረብና እጅ ኳስ እንዲሁም ባድሜንተን፣ ቴኒስና ቼዝ በማጣሪያ የዙር ውድድሮች ቀጥለዋል።

ምንጭ፦ፋና