Worancha ወራንቻ

ሐምሌ ፳፩ (ሀያ አንድ) ቀን ፳፻፬ ዓ/ም ኢሳት ዜና:- ከቅርብ ጊዜ ወዲህ የድምጻችን ይሰማ ተቃውሞውን ለማኮላሸት መንግስት በክፍለሀገራት የሚገኙ ሙስሊም የሆኑና ሙስሊም ያልሆኑ ሰዎችን ከየቦታው በማሰባሰብ እንቅስቃሴውን እንዲያወግዙ በማድረግና በቴሌቪዥን ቀርጾ በማቅረብ ከፍተኛ የፕሮፓጋንዳ ስራ እየሰራ ሲሆን፣ ይህንኑ ስትራቴጂ በሲዳማ ላይ ለመድገም ዝግጅት ጀምሯል። በሲዳማ የተነሳው ተቃውሞ በተለያዩ ጊዜዎች እያገረሸ በንጹህን ዜጎች እና በፌደራል ፖሊስ አባላት ህይወት ላይ ጉዳት እንዲደርስ አድርጓል። ይህንኑ ተከትሎ የክልሉ መንግስት የፊታችን ማክሰኞ  የተወሰኑ ደጋፊዎችን አዋሳ በሚገኘው የባህል አዳራሽ በድብቅ በመጥራት፣ “የሲዳማን ችግር የሚፈጥሩት ጸረ ሰላም ሀይሎች ናቸው” የሚል ፕሮፓጋንዳ ለመስራት በዝግጅት ላይ ነው። በመንግስት ባለስልጣናት በጥንቃቄ የተመረጡ ከ1ሺ በላይ ሰዎች ጥሪ እንደተደረገላቸው ለማወቅ ተችሎአል። ይህ ስትራቴጂ ህዝቡን ከሁለት በመክፈል  ጥያቄውን ለማዳፈን የታለመ መሆኑን የአካባቢው ሰዎች ይናገራሉ። ካለፈው ወር ጀምሮ በዞኑ የሚታየውን አለመረጋጋት ስንዘግብ መቆየታችን ይታወሳል።

በፈዴራል ፖሊስ እና በመልጋ ወረዳ ነዋሪዎች መካከል የተከሰተውን ግጭት ተከትሎ  በወረዳው የነበረው ከፍተኛ የፖለቲካ ውጥረት በመቀነስ ላይ ያለ ቢሆንም መንግስታዊ ስራዎች እንደቆሙ ናቸው። ግጭቱን ምክንያት ኣድርጎ ወደ ወረዳው የገባው የመንግስት የጸጥታ ኃይል እስከኣሁን ድረስ ጉጉማን ጨምሮ በወረዳው እንደሰፈረ ይገኛል። ኣንዳንድ የወረዳው ነዋሪዎች የጸጥታው ኃይል ከወረዳው በኣስቸካይ ለቆ እንዲወጣ በመጠየቅ ላይ ናቸው። ባለፈው ሳምንት በወረዳው ህዝብ እና በፊዴራል ፖለስ ኃይል መካከል በተፈጠረው ግጭት ከሁለቱም ወገን ሰዎች መጎዳታቸው ይታወሳል። በተያያዘ ዜና የማልጋ ወረዳ ግጭት ተከትሎ በወንዶ ገነት ወረዳ ተፈጥሮ የነበረው ኣለመረጋጋት እንዲሁ በመስከን ላይ ነው።  

ውስጥ ኣዋቂ ምንጮች ለወራንቻ ኢንፎርሜሽን ኔትዎርክ እንደጠቆሙት፤ ካለፈው ወር ጀምሮ በሲዳማ ዞን ውስጥ ክልልን ጨምሮ በሌሎች የመልካም ኣስተዳር ጥያቄዎች ላይ ዙሪያ በተቀጣጠለው ህዝባዊ ንቅናቄ በተመለከተ ከሲዳማ ሽማግሌዎች ጋር ለመምከር የክልሉ ርእስ መስተዳደር ቀጠሮ ይዘዋል። በሚቀጥለው ማክሰኞ ይካሄዳል ተብሎ በሚጠበቀው በዚሁ ምክክር ስብሰባ ላይ እንዲገኙ ከሁሉም የሲዳማ ወረዳዎች ከ 40 እስከ 50 የሚሆኑ የኣገር ሽማግሌዎች የተጋበዙ ሲሆን፤ የኣገር ሽማግሌዎቹ ምንን መሰረት ባደረገ መልኩ እንደተመረጡ ኣልታወቀም። እንደ የሲዳማ ፖለቲካ ተንታኞች ከሆነ እነዚህ ወደ ኣንድ ሺ የሚጠጉ ሽማግሌዎች የሲዳማ ህዝብ ያነሳውን የክልል ጥያቄ እንዲተው የማሳመን ስራ እንዲሰሩ በመንግስት የተመለመሉ ሳይሆኑ ኣይቀሩም። መንግስት በቅርቡ የሲዳማ ህዝብ ያነሳውን ክልል ይገባኛል ጥያቄ  ለመቀልበስ በተለያዬ መልክ ጥረት በማድረግ ላይ ሲሆን፤ በሚቀጥለው ሳምንት የምደረገው ጉባኤ የጥረቱ ኣካል ነው። ከኣስር ኣመት በፊት በተመሳሳይ መልኩ መንግስት ደጋፊ ሽማግሌዎችን በማሰባሰብ በወቅቱ የክልል ጥያቄ  ኣንስተው የነበሩት ሰዎች ጸረ ሰላም ኃይሎች በማስባል ማስኮነኑ ይታወሳል።

የከተማው የደኢህዴን ጽህፈት ቤት ከዚህ በፊት በተለያዩ የስልጣን እርከኖች ላይ ተመድበው ይሰሩ የነበሩት ካላ ሳሙኤል ሼባን ጨምሮ  ሌሎች ሁለት ኣመራራትን ከቦታቸው ኣንስቶ በምትካቸው ካላ ባጥሶ ዌጥሶን እና ሌሎች ሁለት ሰዎች ተክቷቸዋል። እነዚህ ከቅርንጫፍ ጽህፈት ቤቱ የተነሱት ካላ ሳሙኤል ሼባ ወደ ዞን የተዛወሩ ሲሆን የተቀሩት ሁለቱ ደግሞ ወደ ክልል መወሰዳቸው ተነግሯል። ከስልጣን ላይ የተነሱት ሰዎች በምን ምክንያት እንደተነሱ ለጊዜው የታወቀ ነገር ባይኖርም ከቅርብ ጊዜ ጅምሮ በሲዳማ ዞን ብሎም በሃዋሳ ከተማ ባለው የፖለቲካ ውጥረት ሳይሆን እንደማይቀር ተገምቷል።

ከኣስተዳዳሩ የሚወጡ መረጃዎች እንደሚያሳዩት፤ የከተማዋን ምክትል ከንቲባ እና ንግድ እና ኢንዱስትሪ መደብን ጨምሮ በሌሎች ስድስት መደቦች ላይ ኣዳዲስ ሰዎች ተሹመዋል። እነዚህ የሹመት መደቦች ለረዥም ወራት ሰዎች ሳይመደቡባቸው መቆየታቸው በከተማዋ ፖለቲካዊ እና ኢኮኖሚያዊ የስራ ሂዳት ላይ ክፍተት መፈጠራቸውን ኣንዳንድ የከተማዋ ነዋሪዎች ከዚህ በፊት ለወራንቻ ኢንፎርሜሽን ኔትዎርክ መጠቆማቸው የሚታወስ ሲሆን፤መደባው የነበረውን ክፍተት እንደሚሞላው ታምኗል። መደቦቹ ላይ ከዚህ በፊት እንደነበረው ሁሉ ሙሉ በሙሉ የሲዳማ ተወላጆች የተሾሙ ሲሆን፤ ሹመቱ የኣዋሳ ከተማ ኣስተዳደር ከሲዳማ እጅ ልነጠቅ ነው በሚል ተነስቶ የነበረውን ህዝባዊ ንቅናቄ ሊያበርደው ይችላል የሚል ግምት ተሰጥቶታል።