POWr Social Media Icons

Wednesday, June 12, 2013

የተምች ትል በሲዳማ ዞን በ ቦርቻ፤ ቦና፤ ዳራ፤ ዳሌ፤ ሃዋሳ ዙሪያ እና በሎካ ኣባያ ወረዳዎች በመህር ምርት ላይ ጉዳት ማድረሱ እየተነገረ  ነው

Army Worm Destroys 8,368ha of Cropland Region



Close to 8,368ha of belg cropland was reportedly destroyed by army worms in Wolayita zone of Southern Regional State, an area that suffered from late onset of the 2013 belg rains and subsequent heavy rains that damaged belg crops, a weekly Humanitarian Bulletin, published by UN Office for the Coordination of Humanitarian Affairs revealed.
Immediate distribution of spraying containers and chemicals to the farmers is required to prevent further loss of belg crops, according to the Office. The Office also warns the damage caused by the army worms will further reduce the expected harvest this season.
Similar incidents were also reported from Boricha, Bona Zuria, Dara, Dale, Hawassa Zuria and Loko Abaya weredas of Sidama zone located in Southern Regional State as well as from drought prone areas of East and West Hararge zones of Oromia Regional State.
የግብፅ ፖለቲከኞች ከአፍራሽ ድርጊታቸው ይቆጠቡ ብሏል
የግብፅ ፕሬዚዳንት፣ ጠቅላይ ሚኒስትርና ሌሎች የአገሪቱ ከፍተኛ ባለሥልጣናት በተገኙበት ባለፈው ሰኞ በተካሄደው ብሔራዊ የናይል ኮንፈረንስ ላይ ታላቁን የህዳሴ ግድብ በተመለከተ በተንፀባረቀው አፍራሽ መልዕክት የተበሳጨው የኢትዮጵያ መንግሥት፣ “ሕዝቡ ለአገሩ ዘብ እንዲቆም” ሲል ጥሪ አቀረበ፡፡ የግብፅ ፖለቲከኞችም ከአፍራሽ ድርጊታቸው እንዲቆጠቡ አሳስቧል፡፡

የግብፅ ፕሬዚዳንት መሐመድ ሙርሲ፣ የአገሪቱ ጠቅላይ ሚኒስትር፣ ሚኒስትሮችና የፀጥታ ባለሥልጣናት በተገኙበት በተካሄደው በዚሁ ስብሰባ፣ “የህዳሴ ግድቡ በግብፅ ላይ አደጋ በመደቀኑ በኢትዮጵያ ላይ በተለያዩ መንገዶች ተፅዕኖ በመፍጠር የግድቡን ሥራ ለማስቆም እንቅስቃሴ እናደርጋለን፤” በማለታቸው የኢትዮጵያ መንግሥት “አፍራሽ ድርጊት” በማለት አጣጥሎታል፡፡ 
የውጭ ጉዳይ ሚኒስቴር ቃል አቀባይ አምባሳደር ዲና ሙፍቲ፣ ማክሰኞ አመሻሽ ላይ ለጋዜጠኞች በሰጡት መግለጫ ነበር የመንግሥትን አቋም ግልጽ ያደረጉት፡፡ “በህዳሴው ግድብ ሽፋን የውስጥ ችግርን ለማቃለል የሚደረገው ጥረት የግብፅን ዘላቂ ጥቅም አያስጠብቅም፤” ያሉት አምባሳደር ዲና፣ “ጦርነቶችና ሌሎች አፍራሽ ድርጊቶች ያረጁና ያፈጁ የ21ኛው ክፍለ ዘመን አስተሳሰብ የማይሸከማቸው ጤናማ ያልሆኑ አስተሳሰቦች ናቸው፤” በማለት የግብፅ ባለሥልጣናትን ድርጊት አጣጥለውታል፡፡ ኢትዮጵያ በዚህ ቀረርቶ ተደናግጣ ግንባታውን ለአንዲት ሰከንድም ቢሆን እንደማታቆም አረጋግጠዋል፡፡ “የግብፅ ወገኖችም ከዚህ አፍራሽ ድርጊት እንዲቆጠቡ፤” ሲሉ አሳስበዋል፡፡ 
“የኢትዮጵያ መንግሥት የግብፅ መንግሥት እየያዘው ባለው መንገድ የዲፕሎማሲ ሥራ እየሠራ ነው ወይ?” በሚል ለቀረበላቸው ጥያቄ ሲመልሱ፣ መንግሥት አስፈላጊውን ክትትል በማድረግ ላይ መሆኑን ገልጸው፣ እንደነሱ በስሜት የመልስ መልስ መስጠቱ ግን አስፈላጊ ሆኖ አልተገኘም ብለዋል፡፡ 
እንደ እሳቸው አባባል፣ የግብፅ ተቃዋሚዎችና ባለሥልጣናት ያንፀባረቁት ሐሳብ የመንግሥት አቋም ስለመሆኑ በኢትዮጵያ የሚገኙትን የግብፅ አምባሳደር ማብራርያ እንዲሰጡ የጠየቀ መሆኑን፣ ጉዳዩን አጀንዳ ለማድረግ እየተሯሯጡ ያሉት ጥቂት ፖለቲከኞች መሆናቸውንም ተናግረዋል፡፡ 
የውኃ ኤክስፐርቶች ቡድን የግድቡ ሪፖርት ይፋ ከተደረገ በኋላ የሚመለከታቸው አካላት በሙሉ ግንዛቤ እንዲያገኙ መደረጉን፣ እስካሁን የዓረብ አገሮች አምባሳደሮች ቡድንና የቡድን ስምንት የበለፀጉ አገሮች በጉዳዩ ላይ ማብራርያ እንዲያገኙ መደረጉን አስረድተዋል፡፡ 
የዓባይ ግድብን ግንባታ ለማካሄድ የተደረገው የወንዙን የፍሰት አቅጣጫ የመለወጥ ሥራ ምንም አዲስ ነገር እንደሌለውና የግንባታው አንድ አካል መሆኑን የተናገሩት አምባሳደር ዲና፣ የግብፅ ባለሥልጣናት የወቅቱ ድርጊት ግን የግብፅ ሕዝብን የትኩረት አቅጣጫ ለማስቀየስ እንደሆነ አስምረውበታል፡፡ 
ያም ሆኖ ግን፣ “የኢትዮጵያ ሕዝብ ለአገሩ ዘብ መቆም አለበት” ያሉ ሲሆን፣ የሚዲያ ሰዎች ይህንን ግንዛቤ በመፍጠር ሚናቸውን እንዲጫወቱ ጥሪ አቅርበዋል፡፡ የኢትዮጵያ መንግሥትን ዝግጅት አስመልክቶ ለቀረበላቸው ጥያቄ ሲመልሱም፣ አስፈላጊ የሚባሉት የደኅንነትና የዲፕሎማሲ ሥራዎች እየተከናወኑ መሆናቸውን ተናግረዋል፡፡ 
ካይሮ ላይ በሚገኘው የኢትዮጵያ ኤምባሲ የሠልፍ እንቅስቃሴ ስለመደረጉ በተመለከተው “ከ30 እና 40 የሚያንሱ ናቸው፡፡ እንዲያውም የፀጥታ ኃይሎች ቁጥር ይበዛል፤” ሲሉ የሕዝቡ ጉዳይ አይደለም በማለት አጣጥለውታል፡፡ በሰሞኑ ጉዳይ ከግብፅ ጋር ትብብር ለማድረግ ያልፈለገችውን የሱዳን አቋምን ያደነቁት አምባሳደር ዲና፣ ግብፆችም ከእነሱ መማር አለባቸው ብለዋል፡፡ 
ሁኔታውን የሚያጤን ቡድን እየተዋቀረ ነው
በኢትዮጵያ የምግብ፣ የመድኃኒትና ጤና ክብካቤ አስተዳደርና ቁጥጥር ባለሥልጣን ተዘጋጅቶ በኢትዮጵያ ደረጃዎች ኤጀንሲ 2004 ዓ.ም. መጨረሻ ላይ የፀደቀው አስገዳጅ የጤና ተቋማት የቁጥጥር ደረጃ ጊዜ ገደብ እንዳሠጋቸው የግል ክሊኒኮች አስታወቁ፡፡
 ለአዳዲስ የጤና ተቋማት ከፀደቀበት ጊዜ ጀምሮ ለነባሮች ደግሞ ከፀደቀ ከአንድ ዓመት ተኩል በኋላ ተግባራዊ እንደሚሆን የተገለጸው የቁጥጥር ደረጃ፣ 39 ዓይነት የጤና ተቋማትን መስፈርት ያስቀምጣል፡፡ 
በመድኃኒት ቁጥጥርና አስተዳደር ባለሥልጣን የቁጥጥር ደረጃ ዝግጅትና አስተባባሪ የሆኑት ሲስተር የሺዓለም በቀለ ለሪፖርተር እንደገለጹት፣ ደረጃው የመንግሥት እንዲሁም የግል ተቋማትንም የሚመለከት ሲሆን ሆስፒታሎች፣ ክሊኒኮች፣ የጤና ጣቢያዎችንና ጤና ኬላዎችን ጭምር ያካትታል፡፡ 
እሳቸው እንደሚሉት፣ ከፍተኛ ክሊኒክ የሚባሉት ልዩ የሕክምና ማዕከላት (Specialty Center) መሆን የሚችሉ ሲሆን፣ ለዚህ በትንሹ አሥር አልጋዎች፣ ሁለት ስፔሻሊስት ሐኪሞች እንዲሁም ፋርማሲ ሊኖራቸው ይገባል፡፡ ይህን ማሟላት ካልቻሉ ደግሞ ሁለት ወይም ሦስት የተመላላሽ ታካሚ አልጋ ኖሯቸው በአንድ ስፔሻሊስት ሐኪም አጠቃላይ አገልግሎት የሚሰጥ መካከለኛ ጤና ተቋም መሆን ይችላሉ፡፡ እንዲህ እንዲህ እያሉ ማሟላት እንደሚችሉ የመስፈርት አማራጮች ተቀምጠዋል፡፡ 
ክሊኒኮች የባለሙያ እጥረትን እንዲሁም የቦታ ጥበትን መሠረት ያደረጉ የተለያዩ ቅሬታዎችን ያሰሙ ሲሆን፣ አንድ ስማቸው እንዲገለጽ ያልፈለጉ የከፍተኛ ክሊኒክ ባለቤት “ሁኔታው በጣም አስቸጋሪ ነው፡፡ የቻልነውን ያህል መስፈርቶቹን አሟልተን ለመቀጠል እንሞክራለን ካልሆነ ግን እንዘጋለን፤” በማለት ለሪፖርተር አስተያየታቸውን ሰጥተዋል፡፡ ሌሎች የተወሰኑ የግል ክሊኒኮችም ቅሬታቸውን እንዲሁ ገልጸዋል፡፡ የወቅቱን የአገሪቱን ተጨባጭ ሁኔታና አቅም የማያገናዝብ ነው በማለት ይናገራሉ፡፡ 
ከቁጥጥር ደረጃው መፅደቅ በፊት በሚመለከታቸው የመንግሥት ተቋማትና በአገልግሎት ሰጪዎች (ጤና ተቋማት) መካከል የጋራ ውይይት መደረጉንና ተመሳሳይ ቅሬታዎች ተነስተው እንደነበር ያስታወሱት የመድኃኒት አስተዳደርና ቁጥጥር ባለሥልጣን ዋና ዳይሬክተር አቶ የሁሉ ደነቀው፣ “ኅብረተሰቡ ደረጃውን የጠበቀ አገልግሎት ማግኘት አለበት፡፡ ሙሉ በሙሉ በነርስ መሥራት አይቻልም፡፡ የቦታ ችግር ካለም ባላቸው ቦታ የሚፈቀደውን አገልግሎት ብቻ ነው መስጠት ያለባቸው፡፡ የቁጥጥር ደረጃው ተግባራዊ ሳይሆን ጊዜ በገፋ ቁጥር ኅብረተሰቡ ይጎዳል፡፡ በተሻለ ውድድር የተሻለ አገልግሎት ሊሰጥበት ሲችል ሴክተሩንም ማቀጨጭ ነው፤” ብለዋል፡፡ 
እሳቸው እንደሚሉት የቁጥጥር ደረጃውን በሚመለከት ባለሙያዎች ከመፅደቁ በፊት የተለያዩ ሁኔታዎችን ከግንዛቤ በማስገባት ተወያይተዋል፡፡ በሒደትም እየታዩ የሚስተካከሉና የሚሻሻሉ ነገሮች ይኖራሉ፡፡ በአሁኑ ወቅትም በመንግሥት የጤና ተቋማት ከቁጥጥር ደረጃው አንፃር ያሉ ክፍተቶችን መፈተሽ የጀመሩ ክልሎች መኖራቸውን አስረድተዋል፡፡ 
“የግል የጤና ተቋማት መጀመሪያም ቢሆን የጊዜ ገደቡ ያንሳል በማለት ቅሬታ አሰምተዋል፡፡ የቁጥጥር ደረጃው ከፀደቀ አንድ ዓመት ሆኗል፡፡ ይህ ማለት ለነባር የጤና ተቋማት ደረጃው ተግባራዊ ለመሆን የቀሩት ስድስት ወራት ናቸው፤” ዳይሬክተሩ ብለው፣ የአገልግሎት ሰጪዎችን፣ የተገልጋዮችንና የሚመለከታቸውን ሌሎች አካላት አስተያየት የሚሰበሰብና ችግሮችን የሚቃኝ ከቁጥጥር ባለሥልጣኑና ከደረጃዎች ኤጀንሲ የተውጣጣ አንድ ቡድን እየተዋቀረ መሆኑን ጠቁመዋል፡፡ 
-ሚኒስትር ሱፊያን ለመጀመርያ ጊዜ ጠንካራ ቁጥጥር ገጠማቸው
-ለመንገድ 29.1 ቢሊዮን ብር ለመከላከያ 7.5 ቢሊዮን ብር ተይዟል
የኢትዮጵያን አጠቃላይ የአገር ውስጥ ምርት (ጂዲፒ) ወደ አንድ ትሪሊዮን ብር የሚያደርሰው የ2006 ዓ.ም. ረቂቅ በጀት ለሕዝብ ተወካዮች ምክር ቤት ቀረበ፡፡ በጀቱን ያቀረቡት የገንዘብና ኢኮኖሚ ልማት ሚኒስትር አቶ ሱፊያን አህመድ ከፓርላማው ጠንካራ ቁጥጥር ገጥሟቸዋል፡፡ 

ሚኒስትሩ የአገሪቱን የዓምናና የዘንድሮ ኢኮኖሚያዊ እንቅስቃሴ ጥሩና በአስደሳች ሁኔታ ውስጥ መሆኑን፣ እንዲሁም ያሉበትን ፈታኝ ችግሮች በቅድሚያ በመዳሰስ ያለውን በጎ ኢኮኖሚያዊ ሒደት ለማጠናከርና ችግሮችን ለመቅረፍ ለተወጠኑ ግቦች ይረዳል ያሉትን የ2006 ዓ.ም. ረቂቅ በጀት አቅርበዋል፡፡ 
በዚህም መሠረት የአገሪቱ የቀጣይ ዓመት በጀት 154 ቢሊዮን 903 ሚሊዮን ብር እንደሚሆን ከዚህ ውስጥም 32.53 ቢሊዮን ብር ለመደበኛ ወጪ፣ 64.32 ቢሊዮን ብር ለካፒታል ፕሮጀክቶች፣ 43.05 ቢሊዮን ብሩ ለክልል መንግሥታት ድጎማ፣ እንዲሁም ቀሪው 15 ቢሊዮን ብር ለምዕተ ዓመቱ ግቦች ማጠናከሪያ ወጪዎች መሸፈኛ እንደሚውል አብራርተዋል፡፡ 
የተጠቀሰው የቀጣይ ዓመት ረቂቅ በጀት ከዘንድሮው ጋር ሲነፃፀር በ12.3 በመቶ ብልጫ ያለው ሲሆን፣ ከረቂቅ በጀቱ ውስጥ ከፍተኛውን የ41.5 በመቶ ድርሻ የያዘው የፌዴራል መንግሥት የካፒታል ፕሮጀክቶች ወጪ ነው፡፡ 
ለካፒታል ፕሮጀክቶች የተመደበው 64.32 ቢሊዮን ብር ሲሆን፣ ቅድሚያ ትኩረት የተሰጣቸው ነባር ፕሮጀክቶች እንዲሆኑ የተወሰኑ አዳዲስ ፕሮጀክቶች ብቻ እንዲካተቱ በማድረግ፣ ከአገሪቱ የገንዘብ አቅም ጋር እንዲጣጣም መደረጉን ሚኒስትሩ አስረድተዋል፡፡ 
የተጠቀሰው የካፒታል ፕሮጀክቶች በጀት ከዘንድሮው ዓመት በጀት ጋር ሲነፃፀር 18.1 በመቶ ጭማሪ ያሳየ ሲሆን፣ ከተያዘው ጠቅላላ የካፒታል በጀት ውስጥ 95.4 በመቶ የሚሆነው ትልቁ ድርሻ በኢኮኖሚና በማኅበራዊ ዘርፎች ለሚካሄዱ ፕሮጀክቶች ቅድሚያ የሰጠ መሆኑን ሚኒስትሩ አብራርተዋል፡፡ 
ከፍተኛ ትኩረት ከተሰጣቸው የካፒታል ፕሮጀክቶች ውስጥ በቀዳሚነት የሚጠቀሰው የመንገድ ልማት ዘርፍ ነው፡፡ በመሆኑም ይህንን ዘርፍ ለሚመራው የኢትዮጵያ መንገዶች ባለሥልጣን 29.07 ቢሊዮን ብር ተመድቧል፡፡ በሁለተኛ ደረጃ የትምህርት ዘርፍ ሲሆን፣ ለትምህርት ሚኒስቴር የካፒታልና መደበኛ ወጪዎች 22.5 ቢሊዮን ብር ተመድቧል፡፡ በሦስተኛ ደረጃ በረቂቅ በጀቱ ትኩረት ያገኘው መከላከያ ሚኒስቴር ሲሆን፣ 7.5 ቢሊዮን ብር አጠቃላይ በጀት ተመድቦለታል፡፡ 
ለ2006 ዓ.ም. ከቀረበው አጠቃላይ በጀት ውስጥ 105.919 ቢሊዮን ብር ከአገር ውስጥ ምንጮች ይገኛል ተብሎ የሚታሰብ ሲሆን፣ ከዚሁ ውስጥ ከግብር ይሰበሰባል ተብሎ የታሰበው 100.3 ቢሊዮን ብር ነው፡፡ ታክስ ካልሆኑ ሌሎች የአገር ውስጥ ገቢዎች ደግሞ 5.587 ቢሊዮን ብር ይሰበሰባል ተብሎ ታቅዷል፡፡ 
ሌላው በጀቱ ታሳቢ ያደረገው 22.822 ቢሊዮን ብር የሚገኘው ከውጭ አገር ብድርና ዕርዳታ ሲሆን፣ ለመሠረታዊ አገልግሎቶች አሰጣጥ ከልማት አጋሮች ይገኛል ተብሎ የሚጠበቀው 9.5 ቢሊዮን ብርና ከዕዳ ስረዛ ይገኛል ተብሎ የሚጠበቀው 98 ሚሊዮን ብርም ለተረቀቀው በጀት የገቢ ምንጮች ናቸው፡፡ 
ከላይ እንደተጠቀሰው ለአጠቃላይ በጀቱ የገቢ ምንጮች የአገር ውስጥ የገቢ ምንጮች፣ የውጭ ብድርና ዕርዳታ እንዲሁም የዕዳ ቅነሳ ሲሆኑ፣ በአጠቃላይ 138.304 ቢሊዮን ብር የሚሆነውን የበጀቱን አካል ይሸፍናሉ፡፡ የተቀረው 16.6 ቢሊዮን ብር በበጀት ጉድለትነት የተያዘ ሲሆን፣ ይህንን የበጀት ጉድለት የዋጋ ንረትን በማያስከትል ሁኔታ ከአገር ውስጥ ብድር ለመሸፈን ታቅዷል፡፡ 
የአገሪቱ አጠቃላይ ምርት በ2006 ዓ.ም. መጨረሻ አንድ ትሪሊዮን ብር የሚደርስ በመሆኑ፣ የበጀት ጉድለቱ የጠቅላላ አገራዊ ምርቱ 1.6 በመቶ ብቻ ነው የሚሆነው፡፡ በመሆኑም በዋጋ ንረት ላይ ተፅዕኖ እንደማያሳድር ይታመናል ሲሉ አቶ ሱፊያን ገልጸዋል፡፡ 
የፌዴራል ዋና ኦዲተር ከወር በፊት ለፓርላማው ባቀረበው ሪፖርት አገሪቱ የምትመድበው በጀት ለምዝበራ የተጋለጠ መሆኑን፣ ባደረገው የናሙና ጥናት መሠረትም በ2004 በጀት ዓመት ሒሳብ ውስጥ 6.5 ቢሊዮን ብር ኦዲት ሊደረግ ባለመቻሉ ለምን እንደዋለ ማወቅ መቸገሩን መግለጹ ይታወሳል፡፡ 
ሚኒስትር ሱፊያን በበጀት መግለጫ ሪፖርታቸው ላይ ይህንን ጉዳይ በማንሳት ሚኒስቴር መሥሪያ ቤቱ ጉዳዩን የሚያጠና በአምስት ከፍተኛ ኃላፊዎች የሚመራ ኮሚቴ ተቋቁሞ እየገመገመ መሆኑን ተናግረዋል፡፡ ሥራው ከተጠናቀቀና መወሰድ የሚገባቸው ዕርምጃዎች ከተለዩ በኋላ ጉዳዩን የተመለከተ ሪፖርት ለፓርላማው እንደሚያቀርቡ ተናግረዋል፡፡ 
ከዚህ በኋላ ለውይይት መድረኩ የተከፈተ ሲሆን፣ ሚኒስትር ሱፊያን ከዚህ ቀደም አይተውት የማያውቁት የሚያሰኝ ጠንካራ ቁጥጥር ከፓርላማው ገጥሟቸዋል፡፡ 
የኦዲት ሪፖርቱ መንግሥት የሚበጅተው በጀት ለምዝበራ እየተጋለጠ መሆኑን በበቂ ማስረጃ አቅርቧል፡፡ በመሆኑም ዕርምጃ ለመውሰድ በቂ ማስረጃ አለ፡፡ ነገር ግን ዕርምጃ የመውሰድ ልፍስፍስነት ሚኒስቴር መሥሪያ ቤቱ ላይ ይታያል በሚል በሚኒስትሩ ላይ ወቀሳ ተሰንዝሮባቸዋል፡፡ 
ወቀሳውን የሰነዘሩት የምክር ቤቱ የመንግሥት ወጪ አስተዳደር ቋሚ ኮሚቴ ምክትል ሰብሳቢ አቶ እሸቱ ተሾመ ናቸው፡፡ “እያንዳንዱ ተቋምና ግለሰብ ኃላፊ የነደፈውን ፕሮግራም ለማስፈጸም የወሰደውን ገንዘብ በአግባቡ ሥራ ላይ ማዋል እንዳለበት፣ ይህንን ካላደረገ በሕግ እንደሚጠየቅ ሕጉ ያስቀምጣል፡፡ ይህንን ተግባራዊ እያደረግን ነው የሚል እምነት የለኝም፤” ብለዋል አቶ እሸቱ፡፡ 
“ጂአይዜድ ተብሎ የሚጠራው ተቋም ይዟቸው የነበሩ የዩኒቨርሲቲ ግንባታ ፕሮጀክቶች አሁንም አላለቁም፡፡ የሚያልቁበት መንገድም አልተቀመጠም፡፡ የመማር ማስተማር ሒደቱ በዚህ ምክንያት እየተጎዳ ነው፡፡ የውኃ መጠጥ ፕሮጀክቶቻችንና ግድቦቻችን በተያዘላቸው ጊዜ አያልቁም፡፡ ከተመደበላቸው በጀት በላይም እየወሰዱ ነው፡፡ በጥራት እየተሠሩ አይደለም፤” ሲሉ አክለዋል፡፡ “ይህን እያየን በጀት እየመደብን መሄድ የለብንም፡፡ ወደ ዕርምጃ መግባትና አፈጻጸማችንን ማሳደግ ይኖርብናል፤” ሲሉ መክረዋል፡፡ 
“የዋና ኦዲተሩን ሪፖርት በተመለከተ አጣሪ ቡድን አቋቁመናል የተባለው ነገር የኦዲት ሪፖርቱን ትክክለኛነት ለማረጋገጥ ከሆነ ተገቢ ነው ብዬ አላስብም፡፡ ይህ ከሆነ በሕግ ነፃ መረጃ ለማቅረብ መብት የተሰጣቸው ተቋሞቻችንን እንዳንጋፋ እፈራለሁ፤” ሲሉ ተቃውሟቸውን ገልጸዋል፡፡ 
“መረጃ ለመሰብሰብ ከሆነም በቂ መረጃ በእጃችን አለ፡፡ ስለዚህ የቡድኑ ሥራ መታወቅና ጥንቃቄ መደረግ አለበት፤” ሲሉ አቶ እሸቱ አስረድተዋል፡፡ 
“የከሰም ተንዳሆ የስኳር ፕሮጀክት አሁንም በመቶ ሚሊዮኖች የሚቆጠር በጀት ተይዞለታል፡፡ ይኼ ፕሮጀክት መቼ ነው የሚያልቀው?” በማለት ረቂቅ በጀቱ ላይ ያላቸውን ተቃውሞ አቶ እሸቱ በማስረጃ አስደግፈው ጠይቀዋል፡፡ 
“ክቡር ሚኒስትሩ ይህ ፕሮጀክት የፈጀውን ዓመት ብዛት ያውቃሉ፡፡ ይህ ምክር ቤት ግልጽ መረጃ ሊቀርብለት ይገባል፡፡ ቢያንስ ቢያንስ ይህ ፕሮጀክት ከታቀደው በጀት እስከ 300 በመቶ በላይ ወስዷል፤” ሲሉ ተከራክረዋል፡፡ 
ሌሎች አባላትም በየዓመቱ ለተመሳሳይ ተግባር በጀት እየተያዘ መሆኑን በመጥቀስ ረቂቅ በጀቱን ለመሞገት ቢሞክሩም፣ በምክትል አፈ ጉባዔዋ ዕድል ተነፍገዋል፡፡ ምክንያቱ ደግሞ በቀጣይ ፕሮግራም በዝርዝር ይታያል የሚል ነው፡፡ 
አንድ ሌላ የምክር ቤቱ አባል በበኩላቸው በዋና ኦዲተሩ ሪፖርት ላይ የተቋቋመው የሚኒስቴሩ አጣሪ የተባለው ኮሚቴ ለፓርላማው ሪፖርቱን ካላቀረበ ይህ በጀት ሊፀድቅ አይገባም ብለዋል፡፡ 
ሚኒስትር ሱፊያን የሰጡት ምላሽ ጠቅለል ያለ ሲሆን ምክር ቤቱ በዚህ ደረጃ መንቀሳቀሱን ግን ደግፈዋል፡፡ 
የተነሱት ችግሮች መኖራቸው እውነት መሆኑን ነገር ግን አብዛኛው በጀትና ፕሮጀክቶች በሕግና በአግባቡ እየዋሉ ናቸው፡፡ ፕሮጀክቶችም በጥራት እየተሠሩ ነው በማለት የተወሰኑ ሕፀፆች አጠቃላዩን ሥዕል እንዳያበላሹ መጠንቀቅ ተገቢ ነው ብለዋል፡፡ 
ረቂቅ በጀቱ እስከ ሰኔ ወር መጨረሻ ድረስ ውይይት ከተደረገበት በኋላ ጠቅላይ ሚኒስትር ኃይለ ማርያም ደሳለኝ በሚገኙበት የፓርላማው ጉባዔ የሚፀድቅ መሆኑን የምክር ቤቱ ሥነ ሥርዓት ደንብ ያስረዳል፡፡