Nomonanoto Show

Wednesday, March 6, 2013

አዋሳ የካቲት 27/2005 የሃዋሳ ከተማ አስተዳደር ባለፉት ስድስት ወራት ከ400 ሚሊዮን ብር በላይ ገቢ መሰብሰቡን የከተማው አስተዳደር ከንቲባ አስታወቁ ። የተሰበሰበው ገቢ ካለፈው ዓመት ተመሳሳይ ወቅት ጋር ሲነጻጸር ከ191 ሚሊዮን ብር በላይ ብልጫ አለው፡፡ ከንቲባው አቶ ዮናስ ዮሰፍ ትናንት ለኢትዮጵያ ዜና አገልግሎት እንደገለጹት ገቢዉ የተሰበሰበዉ ቀጥታና ቀጥታ ካልሆኑ ታክሶች፣ከማዘጋጃ ቤት አገልግሎትና ከሌሎች ገቢዎች ነዉ ። በከተማው የገቢ አስተዳደር ስራዎችን ቀልጣፋና ውጤታማ ለማድረግ የሚያስችሉ የተለያዩ የታክስ ማሻሻያዎችን ተግባራዊ በመደረጉ የተሰበሰበው ገቢ ካለፉት ዓመታት ጋር ሲነጻጸር ከፍተኛ መሻሻል አሳይቷል ። ገቢዉ ካለፈው ዓመት ተመሳሳይ ወቅት ጋር ሲነጻጸር በ191 ሚሊዮን 252 ሺህ 029 ብር ብልጫ እንዳለው አስታዉቀዋል ። በከተማ አስተዳደሩ ተቀርፆ እየተተገበረ ያለው የታክስ ማሻሻያ ፕሮግራም፣ አዳዲስ ግብር ከፋዮች ወደ ታክስ ስርዓቱ መግባታቸውና ግብር ከፋዩ ህብረተሰብ ግዴታውን በአግባቡ መወጣት መጀመሩ ለገቢው ማደግ ከፍተኛ አስተዋጽኦ ማበርከቱን ጠቁመዋል። በግማሽ በጀት ዓመቱ የግብር ከፋዩን ቁጥር ለማሳደግ አመራሩ፣ ባለሙያውና ሌሎች የባለድርሻ አካላት ባደረጉት የተቀናጀ ጥረት በደረጃ ሀ እና ለ 1ሺህ 564 ግብር ከፋዮች ወደ ግብር ስርዓቱ መግባታቸውን የገለጹት አቶ ዮናስ እነዚህ ግብር ከፋዮች ግዴታቸውን በአግባቡ መወጣት ጀምረዋል ብለዋል ። በተጨማሪ በከተማ አስተዳደሩ የሽያጭ መመዝገቢያ ማሽን መጠቀም ያለባቸው ግብር ከፋዮች መሳሪያውን ገዝተው እንዲጠቀሙና የገቢ አሰባሰብ ስርዓቱ ጤናማና በዘመናዊ ቴክኖሎጂ የተደገፈ እንዲሆን 1ሺህ 177 የሽያጭ መመዝገቢያ ማሽኖችን ለግብር ከፋዩ ህብረተሰብ እንዲሸጥ መደረጉን ገልጠዋል ። በቀጣይ በከተማው የግብር አሰባሰብ ስርዓቱን ቀልጣፋና ውጤታማ ለማድረግ የመረጃ ቴክኖሎጂ ስራን ለማጠናከር ከክልሉ ገቢዎች ባለስልጣንና ከኢትዮ ቴሌኮም ጋር በመሆን የግብር፣ የአከራይ ተከራይ፣ የደረጃ ሀ፣ ለ፣ ና ሐ ፣ የመሬት እና ሌሎች መረጃዎች በዘመናዊ መልክ በኮምፒውተር የማደራጀት ስራዎች መከናወናቸውንም አቶ ዮናስ አስታዉቀዋል ።http://www.ena.gov.et/Story.aspx?ID=6079&K=1
አዲስ አበባ የካቲት 27/2005 መገናኛ ብዙሃን በ2005 ዓ.ም ለሚካሄደው የአካባቢና የአዲስ አበባ ምርጫ የፖለቲካ ፓርቲዎች የሚያደርጉትን የቅስቀሳ ፕሮግራም በተገቢው መንገድ እንዲያስተናግዱ የኢትዮጵያ ብሮድካስት ባለሥልጣን አሳሰበ፡፡ ተወዳዳሪ የፖለቲካ ፓርቲዎች ከመጪው መጋቢት 4 ቀን እስከ ሚያዚያ 4/2005 ድረስ ለሚያቀርቡት የምርጫ ቅስቀሳ የሬዲዮና የቴሌቪዥን የአየር ሠዓትና የጋዜጣ አምድ ድልድል በዕጣ ተከናውኗል፡፡ የባለሥልጣኑ ምክትል ዋና ዳይሬክተር አቶ ልዑል ገብሩ በዚሁ ጊዜ እንደገለፁት መገናኛ ብዙሃን ፓርቲዎች የሚያቀርቡትን የቅስቀሳ ፕሮግራም ህግና መመሪያው በሚፈቅደው መሰረት በአግባቡ ማስተናገድ ይጠበቅባቸዋል፡፡ ድልድሉ የኢትዮጵያ ምርጫ ቦርድ ባፀደቀው መመሪያ መሰረት መከናወኑንና 50 በመቶ ሁሉም ፓርቲዎች በእኩል የሚካፈሉት ሆኖ 30 በመቶ በሕዝብ ተወካዮችና በክልል ምክር ቤቶች ባላቸው ብልጫ፣ 20 በመቶውን ጊዜ ደግሞ ባቀረቡት እጩ ተወዳዳሪ ብዛት የሚጠቀሙ ይሆናል፡፡ በዚሁ መሰረትም 24ቱ የፖለቲካ ፓርቲዎች በሬዲዮ 19 ሠዓት ከ20 ደቂቃ፣ በቴሌቪዥን 12 ሠዓትና በተለያዩ ጋዜጦች 48 አምዶችን ያለምንም ክፍያ የምርጫ ቅስቀሳቸውን እዲያካሂዱ መደልደሉን ተናግረዋል፡፡ ለዚሁ ስራ የተመደበው የአየር ሠዓትና የጋዜጣ አምድ በገንዘብ ሲተመን ዘጠኝ ሚሊዮን ብር ያህል መሆኑንም ጠቁመዋል፡፡ ይህም ለዴሞክራሲ ሥርዓት ግንባታና የፖለቲካ ፓርቲዎቹ ፖሊሲያቸውን፣ ስትራቴጂያቸውንና ፕሮግራማቸውን ለህብረተሰቡ በነጻነት እንዲያቀርቡ መንግሥት ካለው ቁርጠኝነት አንጻር የተደረገ ነው ብለዋል፡፡ ከዚህ ቀደም በተደረጉ ምርጫዎች ልምድ እንደታየው የተመደበላቸውን የአየር ሠዓትና የጋዜጣ አምድ ያለመጠቀም ችግር መታየቱን ያስታወሱት አቶ ልዑል ፓርቲዎች የተሰጣቸውን እድል በአግባቡ በመጠቀም ለመራጩ ሕዝብ ፖሊሲና ስትራቴጂያቸውን እንዲያስተዋውቁ ጠይቀዋል፡፡ በቅስቀሳቸው ወቅትም የተለያዩ ህጎችና አሰራሮችን በተከተለና ሕገ መንግሥቱን ባከበረ መልኩ ፕሮግራማቸውን በተመደበላቸው ጊዜ እንዲያቀርቡም አሳስበዋል፡፡ ፓርቲዎቹ በመገናኛ ብዙሃን የምርጫ ቅስቀሳቸውን በሚያቀርቡበት ሂደት ችግር ቢያጋጥማቸው ለኢትዮጵያ ብሮድካስት ባለሥልጣን ቅሬታቸውን ማቅረብ የሚችሉ መሆኑንም ምክትል ዋና ዳይሬክተሩ ጠቁመዋል፡፡ የቅንጅት ፓርቲ ዋና ፀሃፊና እጩ ተወዳሪ አቶ ሳሳሁልህ ከበደ ድልድሉን አስመልክቶ በሰጡት አስተያየት ከምርጫ 97 ጀምሮ የነበረው ድልድል በፓርላማ መቀመጫና በእጩ ተወዳዳሪ ብዛት እንደነበረ አስታውሰው አሁን ኢህአዴግ ፓርቲዎችን ለማበረታታት ያደረገው 50 በመቶውን የአየር ጊዜ በእኩል የማከፋፈል አሰራር የተሻለ ነው፡፡ እንደ ቅንጅት ፓርቲ ካለፉት ሶስት ምርጫዎች አኳያ የተሻለ የዕጣና የድልድል ወቅት መሆኑን የጠቀሱት አቶ ሳሳሁልህ ፓርቲዎች በቀጣይ አገራዊ ምርጫዎች እንዲሳተፉ የሚያነሳሳና በመገናኛ ብዙሃን የመጠቀም እድላቸውንም የሚያሰፋ እንደሆነ አመልክተዋል፡፡ የመላው ኢትዮጵያዊያን ብሔራዊ ንቅናቄ ፕሬዚዳንት አቶ መሳፍንት ሽፈራው ደግሞ ውድድሩ ምንም እንኳን ገዥው ፓርቲ በመላ አገሪቱ እጩዎችን ያቀረበ በመሆኑና ባለው የፓርላማ ወንበር ብዛት ምክንያት የመገናኛ ብዙሃንን የመጠቀም እድሉ የተራራቀ መሆኑን ገልጸዋል፡፡ ''የተሰጠን የአየር ሠዓት ከመራጮቻችን ጋር ለመገናኘት የፈለግነውን ያህል ባይሆንም በጥቂቱ ደህና ነው ማለት ይቻላል'' ሲሉ አክለዋል፡፡ የኢትዮጵያ ሠላማዊ ዴሞክራሲያዊ ፓርቲ ሊቀመንበር አቶ ሠይድ ይመር ዓሊ በበኩላቸው የተሰጠው የአየር ሠዓትና የጋዜጦች አምድ በቂ ባይሆንም ልምዱ ግን ለዴሞክራሲ ግንባታ ትልቅ ውጤት እንደሚኖረው እንደሚያምኑ ገልፀዋል፡፡ በመሆኑም ጅምሩ ሊቀጥል የሚገባውና የሚበረታታ እንደሆነ አመልክተዋል፡፡ ተወዳዳሪ የፖለቲካ ፓርቲዎቹ የምርጫ ቅስቀሳቸውን በአራት የቴሌቪዥን ጣቢያዎች፣ አምስት ጋዜጦችና 13 የሬዲዮ ጣቢያዎች በአማርኛ፣ ኦሮምኛ፣ትግርኛ፣ አፋርኛ፣ሶማሊኛና ሀረሪ ቋንቋዎች እንደሚያካሂዱ ኢዜአ ዘግቧል፡፡