POWr Social Media Icons

Thursday, October 4, 2012


ስሞኑን ከፌደራል እስከ ወረዳ ደረጃ የምገኙ የሲዳማ ኣመራር ኣባላት በሃዋሳ ከተማ በሲዳማ የወደፊት እጣ ፋንታ ላይ መክረው ባለ ዘጠኝ ነጥብ የኣቋም መግለጫ በማውጣት ኣጠናቀዋል። ኣንዳንዶች እንደምሉት ከሆነ የሲዳማ ኣመራሮች ዳግመኛ በሃዋሳ ከተማ ላለመሰባሰብ የወሰኑ ይመስላል፤ ምክንያቱም የሃዋሳን ከተማ ኣስተዳደር በሌሎች በሳል በምባሉ ብሄሮች እንድተዳደርላቸው ተሰማምተዋል እና ሃዋሳ ከእንግድህ የሲዳማ ኣስተዳደር ኣካል ባለመሆኑ በሃዋሳ ከተማ በሲዳማ ስም የመሰባሰብ እድል የላቸውም ይህንን እንኳን ኣርቆ ማየት ብሳናቸውም።

ወደ ቁምነገሩ ስንመለስ የሲዳማ ህዝብ ኢህኣደግ ይጠቅመኛል በመልካምኣስተዳደር በኩል ያለብኝን ችግር ይፈታልኛል በማለት በተደጋጋሚ በችግሩ ጊዜ ፈጥኖ በመድረስ ሲመርጠው ብቆይም፤ ደኢህዴን/ ኢህኣዴግ የሲዳማን ህዝብ ሲያሳዝን የሰሞኑ ክስተት የመጀመሪያው ኣይደለም። የዛሬ ኣስር ኣመት ደምኣፍሳሹ የደኢህዴን መንግስት የጸጥታ ኃይሎቹን ኣሰማርቶ በንጽሃን የሲዳማ ተወላጆችን ላይ በጠራራ ጸህይ የጥይት መዓት ኣውርዶ በርካታዎቹን በመግደል ሌሎቹን ኣቁስለዋል ፤ በድርግቱም የሲዳማ ህዝብ ክፉኛ ኣዝኗል፤ ሆኖም ከስህተቱ ይማራል ዳግመኛ መሰል ተግባር ኣይደግምም በማለት በባለፈው ምርጫ በነቅስ ወጥቶ እንደመረጠው ይታወሳል። ሰሞኑን ደግሞ ከባለፈው ስህተቱ ያልተማረው ደኢህዴን የሲዳማ ህዝብ ላሳየው ክብር እና ፍቅር የፓርቲው ኣመራሮች የሰጡት ምላሻ ራስን በራስ የማስተዳደር መብቱን በመንጠቅ የራሱን ከተማ በተቀጣሪዎች እንዲያስተዳድር ማድረግ ሆኗል።

የምገርመው ደግሞ የሲዳማ የክልል ጥያቄን የሚያነሱ ኣካላት የሲዳማን ህዝብ የማወክሉ ናቸው ብለዋል። ለሲዳማ ህዝብ ዲሞክራሲያዊ መብት መከበር ሲሉ በደኢህዴን እስር ቤቶች የሚማቅቁት ብሎም ተሰደው በባዕድ ኣገራት የስደት ጉሮ የምገፉት ውድ የሲዳማ ልጆች ጸረ ሲዳማ ተብለዋል። በተገላብጦሽ ፤የሲዳማ ራስን በራስ የማስተዳደር መብት በመንጠቅ በሃያ ኣመቱ የኢህኣደግ ኣስተዳደር ታይቶ በማይታወቅ ሁኔታ ህገመንግስታዊ መብቱን በማስነጠቅ የተማረ ሰው የለህም፤ የሃዋሳን ከተማ ማስተዳደር ኣልቻልክም፤ወዘተ በማለት ለዘመናት በህዝቦች ዘንድ ተከብሮ የኖረውን ህዝብ ያዋረዱት የሲዳማ ተወካዮች ናቸው ተብለው ተሞካሽተዋል። እነዚሁ የሲዳማ ህዝብ ተወካዮች ነን ባይ ኣመራሮች የሲዳማ ህዝብ ህልውናማንነት ኣደጋ ላይ ጥለዋል፤ ራስን በራስ የማስተዳደር መብቱን ጥያቄ ውስጥ ከተዋል፤ ሲዳማን ሌሎች እንዲያስተዳድሩት ያለ ህዝቡ ፍላጎት ጋብዘዋል፤ የሲዳማ ህዝብ ራሱን ማስተዳደር ያልቻለ ህዝብ ነው የምል ኣመለካከት ኣብሮት በምኖሩ በሌሎች ብሄሮች እንድፈጠር ኣድርገዋል፤ የሲዳማን ህዝብ የራሱን ግዛት ማስተዳደር ያልቻለ በሃያ ኣንድኣመት የኢትዮጵያ ብሄር ብሄረሰቦች እና ህዝቦች ታሪክ የመጀመሪያው ብሄር እንድሆን ኣድርገውታል፤ ወዘተ።


እዚህ ላይ ኣንድ የሲዳማ ሃዮ ወይም ምሳሌያዊ ታሪክ ማንሳት እወዳለሁ ። ይሄውም፦ ኣንድ ወቅት የኣንድ የሲዳማ ኣባት መንገድ እየተጓዙ በቃቻ መሃል (በመንደር መካከል) ሲያልፉ ኣንድ ህጻን ምርር ብሎ ስያለቅስ ሰምተው የኣባትነት ኣንጀት ኣላስችል ብሎኣቸው፤ ህጻኑ ወደሚያለቅስበት ግቢ ተጠግተው በኣጥር ተንጠራሪተው ወደሚያለቅሰው ህጻን ሲያዩ ፤ ህጻኑ የምያለቅሰው እናቱ ጸጉሩን እየላጨችው መሆኑን ተረድተው፤ ጸጉርህን የምትላጨው እናትህ የያዘህ ደግሞ ኣባት እንግድህ እኔ ምን ላደርግ እችላለሁ ብሎ ኣለ ይባላል። እንግድህ ከምሳሌው እንደምንረዳው የሲዳማ ህዝብ እየለጩ ያሉት የራሱ ኣመራሮች ናቸው።

እነዚህ የሲዳማን ኣመራሮች እነማናቸው ብለን ሲናስብ እና የኣንዳንዶቹን የትናንትናውን ስብዕናቸውን ስንገመግም ትንግርት ነው የምሆነው። ትናንትና የምያውቋቸው ዛሬ ላይ ሆነው በሲዳማ ህዝብ የያዙትን ኣቋም ላስተዋለ ሰው በኣስተሳሰባቸው ላይ ያሳዩት ለውጥ እንዴት ልፈጠር እንደቻለ ለማሰብ በራሱ ኣስቸጋር ነው። ለኣብነት ያህል በዩኒቨርስቲ ህይወታቸው ለሲዳማ ህዝብ መብት መከበር የምታገሉ የነበሩት የዛሬዎቹ ኣብዘኛዎቹ የሲዳማ ኣመራሮች፤ ዛሬ ደግሞ በተቃራኒው ቆመዋል። ትናንትና በራሳቸው ያስቡ የነበሩት እነዚሁ ግለሰቦች ዛሬ የሌላ ግለሰብ ኣመለካከት ተቀብሎ ከማራመድ ውጭ ያንን የመሰለ የህዝብ ተቆርቋሪነታቸውን ያንጸባረቁበት ኣመለካከት ውሃ በልቶታል። እንዳው ከደኢህዴን ኣመለካከት ውጭ ማሰብ ኣቅቷቸዋል ማለት እውነታ ኣለው።

እኔ እንደምመስለኝ ከሆነ እንዚህ ኣመራር ኣባላት ባለፉት ጥቂት ኣመታት ማለትም በደኢህዴን መስመር ውስጥ ገብተው መስራት ከጀመሩበት ጊዜ ጀምረው በራሳቸው ማሰብ በማቆማቸው የተባሉትን ከማድረግ ውጭ የራሳቸውን ኣቋም መያዝ ኣቅቷቸዋል።

ለመሆኑ በተለይ በዚህ ሳምንት ያወጡት የኣቋም መግለጫም ሆነ ወሳኔዎቹ በርግጥ የሲዳማን ህዝብ ይጠቅማሉ? ወይስ የሲዳማን ህዝብ ጥቅም ባያስጠብቁም የደኢህዴን ፖሊስ ለማስፈጸም ያህል የተወሰዱ እርምጃዎች ናቸው? ቀጥዬ ማነሳቸው ነጥቦች ናቸው ፤ እመለስበታለሁ።

ክቡራን ኣንባቢያን ከላይ በተነሳው ሀሳብ ላይ ያላችሁን ኣስተያዬቶች በብሎጉ ኣድራሻ ላኩልን
ባለፈው አመት ነሐሴ ወር ላይ ነበር በሀዋሳ ከተማ እና በሲዳማ ዞን በአንዳንድ ወረዳዎች ሁከት የመፍጠር አዝማሚያ የተከሰተው፡፡

የሲዳማ ህዝብ ጥያቄና ፍላጎት ነው በሚል የብሔሩን አቋምና ሀሳብ የማይወክሉ ግን ደግሞ ይህንኑ መንፈስ የያዙ ሁከት የመፍጠር አዝማሚያ መከሰቱ ይታወሳል፡፡

እናም የተፈጠረውን ሁኔታ ለመገምገምና ጉዳዩን ለማጣራት የብሔሩ ተወላጆች የሆኑ ከፌደራል እስከ ወረዳ ድረስ የሚገኙ ከፍተኛ እና መካከለኛ አመራሮች የተገኙበት ግምገማ ለአንድ ሳምንት ተካሂዷል፡፡

በግምገማው ማጠቃለያ ላይ የክልሉ ርዕሰ መስተዳደር ክቡር አቶ ሽፈራው ሹጉጤ እንዳሉት የተፈጠሩት ሁኔታዎች የኪራይ ሰብሳቢና የጸረ ሰላም ኃይሎች አጀንዳ እንጂ የሲዳማ ህዝብ ፍላጎት ያለመሆኑን ተናግረዋል፡፡

በወቅቱ የተፈጠረው ሁኔታ ለማርገብ የተደረገው ጥረት እንደተጠበቀ ሆኖ የኪራይ ሰብሳቢ እና የጸረ ሰላም ኃይሎች የህብረተሰቡን አቅጣጫ ለማስቀየር ያደረጉት ጥረት ያለመሳካቱንና ህልማቸው ቢሳካ ኖሮ በውስጠ ድርጅቱ ላይ የሚፈጥረው ተጽእኖ የከፋ ይሆን ነበር ብለዋል፡፡

የሲዳማ ህዝብ ከየትኛውም ብሔር እና ብሔረሰብ ጋር ተፋቅሮ እና ተከባብሮ የኖረ ወደፊትም የሚኖር ነው ያሉት ርዕሰ መስተዳደሩ ይሁንና ኪራይ ሰብሳቢዎች እና የጸረ ሰላም ኃይሎች በወቅቱ የፈጠሩት አጀንዳ ይህንን ህብረ ብሄራዊነት ለማጥፋት እንደሆነ ገልፀዋል፡፡

የኪራይ ሰብሳቢነት አስተሳሰብ በታየባቸው አንዳንድ አመራሮች ላይም በየደረጃው በተካሄደው የሂስ ግለሂስ መድረኮች ላይ የእርምት እርምጃ መወሰዱንም የገለጹት ርዕሰ መስተዳደሩ በቀጣይም የኪራይ ሰብሳቢነትን አስተሳሰብ ከምንጩ የማድረቁ ተግባር ተጠናክሮ ይቀጥላል ብለዋል፡፡

አመራሮቹ መንታ መንገድ የለም በሚል ርዕስ ለአንድ ሳምንት ያካሄዱትን ግምገማ ያጠናቀቁት በጋራ መግባባት ላይ በመድረስ ባለ ዘጠኝ ነጥብ የአቋም በግለጫ በማውጣት ነበር፡፡

በመሆኑም በየጊዜው የሚፈጠሩ የጥገኘነት እና የጸረ ሰላም ኃይሎች የማደነጋገሪያ አጀንዳ የማይበገር አብዮታዊ ስብዕና የተላበሰ የህዝበ መሪነት ሚናችንን እንወጣለን ብለዋል አመራሮቹ፡፡

አመራሮቹ በባለ ዘጠኝ ነጥብ በገለጹት የአቋም መግለጫቸው የሀዋሳን ከተማ የአመራር ስምሪት ከኪራይ ሰብሳቢነት የጸዳና ብቁ አመራር ከየትኛውም መዋቅር ቢመደብ ትግሉን ለማስቀጠል ቃል ገብተዋል፡፡

ለዘመናት ተከባብሮና ተዋዶ የኖረውን የሲዳማንና የወላይታን ህዝብ ለማጋጨት ብሎም ለማለያየት ሲንቀሳቀሱ የነበሩት ጥገኞችና ጸረ ሰላም ኃይሎች የሲዳማን ህዝብ አይወክሉም የሚሉት አመራሮቹም በአቋም መግለጫቸው ካሰፈሩት ውስጥ ይጠቀሳል፡፡

የወጣቱ ዋነኛ ችግር የስራ አጥነት ችግር ነው ያሉት አመራሮቹ ይህን ችግር በገጠር እና በከተማ የወጣቱን ተጠቃሚነት ለማረጋገጥ ከምን ጊዜውም በላይ መዘጋጀታቸውንም አስታውቀዋል፡፡
ለአንድ ሳምንት በተካሄደው ግምገማ የፌደራል የክልል የዞን የወረዳና የከተማ አስተዳደር ከፍተኛ እና መካከለኛ የሲዳማ ብሔር ተወላጆች ተገኝተዋል





http://www.smm.gov.et/

የጽህፈት ቤቱ ኃላፊ አቶ ታደሰ ካቢሶ እንደገለፁት በወረዳው ከ15ዐ  ሺህ በላይ አርሶ አደሮች 16ቱን የጤና ፓኬጆችን በግል፣ በቤተሰብ እንደዚሁም በህብረተሰብ ደረጃ ተግባራዊ በመደረጉ የተገኘው ውጤት አበረታች ነው፡፡
በአካባቢ ጤና አጠባበቅና በቤተስብ ጤና እንክብካቤ እንዲሁም ዋና ዋና ተላላፊ በሽታዎችን መከላከልና መቆጣጠር እንደተቻለም ኃላፊው ገልፀዋል፡፡

የሁላ ወረዳ ምክትል አስተዳዳሪና የሲቪል ሰርቪስ ጽህፈት ቤት ኃላፊ አቶ ተረፈ ዳሞታ በበኩላቸው በወረዳው የተጀመረው የጤና ልማት ሠራዊት ግንባታ የእድገትና ትራንስፎርሜሽን እቅዱን እውን ለማድረግ የበኩሉን የሚወጣ ጤናማ ህብረተሰብ ለመፍጠር የሚያበረክተው አስተዋፅኦ የጎላ መሆኑን አስረድተዋል፡፡
የዞኑ ጤና መምሪያ ተወካይ አቶ ቃሪሳ ዳፉርሳ እንዳሉት በዞኑ የጤና ኤክስቴንሽን ኘሮግራም ትግበራው ውጤት እየተመዘገበ በመሆኑ ቀጣይነት እንዲኖረው ክትትልና ድጋፍ ከባለሙያና አመራሩ ይጠበቃል ብለዋል ሲል የሲዳማ ዞን መንግስት ኮሚኒኬሽን ዘግቧል፡፡


በሰለሞን ጥበቡ
በዚህ ባለንበት በ21ኛው ክፍለ ዘመን ቴክኖሎጂ በፈጠረልን ምቹ ሁኔታ መረጃን በፍጥነትና በፈለግነው ቦታ መለዋወጥ አመቺ ሆኗል፡፡ ከእነዚህ መረጃን የመለዋወጫ መንገዶች ውስጥ ማኅበራዊ ድረ ገጾች ይገኙበታል፡፡ ፌስቡክ፣ ትዊተር፣ ታግድና የመሳሰሉት ከማኅበራዊ ድረ ገጾች የተወሰኑት ናቸው፡፡ እኔ በግሌ እነዚህ ከላይ የጠቀስኳቸው ማኅበራዊ ድረ ገጾች አካውንት ቢኖረኝም፣ በአንድ ወር አንድ ጊዜ እንኳን የማልከፍታቸውም አሉ፡፡ እንዲያውም ትዊተርን ከፍቼ አላውቅም ብል ይሻለኛል፡፡
ይህም የሆነበት ምክንያት ትዊተር ስለማልወድ አይደለም፡፡ ይልቁንም የትዊተር ተጠቃሚ ጓደኞች ስለሌሉኝና ምንም ዓይነት መረጃ ማግኘት ስላልቻልኩ ነው፡፡ ታዲያ ምንም ዓይነት መረጃ የማይገኝበትን አካውንት መክፈት በድንጋይ ላይ ውኀ እንደማፍሰስ ነውና ላለመክፈት ወሰንኩ፡፡ አሁን እንዲያውም ፓስወርዱ ጠፍቶብኛል፡፡ ስለዚህ ከትዊተር ጋር ፍቺ ፈጽሜያለሁ፡፡

ትኩስ መረጃዎች የማይገኙባቸው ሌሎች ድረ ገጾችም ዕጣ ፈንታቸው ይህ ነው፡፡ ከእኔ ጋር መፋታት፡፡ በኢትዮጵያ ብዙ ተጠቃሚ እንዳለው ወደሚነገርለት ፌስቡክ ስንመጣ ግን ከላይ ከጠቀስኳቸው ማኅበራዊ ድረ ገጾች በተቃራኒው ነው፡፡ ምክንያቱም ፌስቡክ ላይ ምን የሌለ ነገር አለና? ማኅበራዊ፣ ኢኮኖሚያዊ፣ ፖለቲካዊ፣ ስፖርትና ሌሎችም ወቅታዊ ጉዳዮች እንደወረዱ የሚገኙበት ብቸኛው ቦታ ፌስቡክ አይደለም እንዴ? እውነቴን ነው የምላችሁ “መርካቶ ምን ጠፍቶ” የሚለው ማስታወቂያ ለሸቀጣ ሸቀጥ እንደሆነ ሁሉ፣ ትኩስ መረጃዎችን ለማግኘት ደግሞ ፌስቡክ ምን ጠፍቶ ማለት ይቻላል፡፡ የአገራችን ሚዲያዎች መረጃን ቶሎ አያደርሱም እየተባለ ይታማሉ፡፡
“ትዝብት ነው ትርፉ” ያለው ማን ነበር? መተዛዘብ ነው እንጂ ፌስቡክ ተጠቃሚ የሆነ እነርሱን ማን ይለምናቸዋል፡፡ ፌስቡክን ለአንድ ደቂቃ መጎብኘት በቂ ነው፡፡ የቢቢሲ፣ የአልጄዚራና የሌሎችም የውጭና የአገር ውስጥ ዘገባዎች እንደወረዱ ማግኘት እየተቻለ የምን መለማመጥ፡፡

ምናልባት የአገር ውስጥ ሚዲያዎችን ለማበረታታት ካልሆነ በስተቀር ፌስቡክ እያለ ደግሞ ለመረጃ፡፡ ለነገሩ የአገር ውስጥን ምርት መጠቀምም አልተለመደ እንኳን የአገር ውስጥ ሚዲያ፡፡ እኔ ግን የሚገርመኝ እነዚህ ፌስቡክ ላይ የሚለቀቁ መረጃዎችና ሐሳቦች በጋዜጦችና በሌሎች ኤሌክትሮኒክስ ሚዲያዎች ለምን እንደማይወጡ ነው፡፡
በእርግጥ አንዳንድ ፌስቡክ ላይ የሚወጡ መረጃዎችና ሐሳቦች በፎቶ ኤዲቲንግ የታገዙና የተጋነኑ ናቸው፡፡ ግለሰብንም ዒላማ አድርገው የሚወጡ የተቀነባበሩ ፎቶዎች አሉ፡፡ ይህ ዓይነት አገላለጽ ተገቢ ባይሆንም በኤዲቲንግ የታገዘውን ፎቶ ትተን በፎቶው ላይ የሚጻፉ ሐሳቦችን ስንመለከት ጥሩ መረጃ ይሰጡናል፤ በጣም አስተማሪዎችም ናቸው፡፡

በነገራችን ላይ የአንድን ሰው የአስተሳሰብ ብስለትም በተወሰነ ፌስቡክ ላይ ፖስት በሚያደርጋቸው ነገሮች መረዳት ይቻላል፡፡ አሁን አሁንማ ሳስበው በፌስቡክ ሱስ ከተጠመድኩበት ወጥመድ መውጣት ሁሉ የምችል አይመስለኝም፡፡ ግን ወድጄ እኮ አይደለም፡፡ ይህ የደራው የመረጃ የሐሳብ ገበያ አለቅ ብሎኝ እንጂ፡፡ ገና አሐዱ ብዬ ኢንተርኔት ስከፍት መጀመሪያ የማየው የፌስቡክ አካውንቴን ነው፡፡ ዛሬስ ምን አዲስ ነገር አለ? የፌስቡክ ዘመዶቼስ ምን አሉ? የሚለውን ካላየሁ ሌላ ሥራም አይያዝልኝ፡፡ ሌላ ሥራ እየሠራሁም በየደቂቃዎች ፌስቡኬን አያለሁ፤ ለምን ብትሉኝ መልሴ ፌስቡክ እኮ ነው፡፡

ፌስቡክ እንደ ኢትዮጵያ ሬዲዮኖችና ቴሌቪዥን አሥር ጊዜ ዜና አይደግምም፤ መረጃ ፌስቡክ ላይ በየሰከንዱ ነው የሚለዋወጠው፡፡ ለዚያውም ያለምንም መሸማቀቅና መፍራት ማንም የመሰለውን ሐሳብና ያገኘውን መረጃ እንደወረደ ማሰራጨት የፌስቡክ ልዩ ባህሪው ነው፡፡ ታዲያ ይህን የመሰለ አስተሳሰብን የሚያሰፋ “ፕሮቲን” አይቼ እንዴት ሳይበላ ይቀራል? “እንዴት አይከንፍ ሰው ይህን ለምዶ” ብሎ ነበር ሙዚቀኛው ለድሬ የዘፈነው፡፡ እኔስ ይህን የፌስቡክ ነፃነት ለምጄ እንዴት ወደ ፌስቡክ አልከንፍ? አንድ የፌስቡክ ጓደኛዬ ፖስት አድርጎት ያየሁት ምን ይላል መሰላችሁ? “ፌስቡክ ልተው ብዬ ተናነቀኝ እምባ” ይላል፡፡ እርሱን ብቻ ቢሆን አሪፍ አልነበር ችግሩ፤ የእኔም መሆኑ ነው እንጂ፡፡ ይህን ሁሉ የነጻነት ድግስ ትቶ እንዴት ይኖራል? ድሮ ድሮ “ሆድ ያባውን ጌሾ ያወጣዋል” ይባል ነበር፡፡ አሁን አሁን ግን ሆድ ያባውን ፌስቡክ ያወጣዋል መባል ተጀምሯል፡፡ ሁሉም የፌስቡክ ተጠቃሚ በውስጡ ያለውን ብሶትም ሆነ ደስታ ያለምንም መሸማቀቅ ፌስቡክ ላይ ቁጭ ነው፡፡ አቦ ፌስቡክ አሁንም ዕድሜህን ያርዝምልን እንጂ ገና ብዙ እናይብሃለን ብለን ተስፋ እናደርጋለን፡፡

ሌላው ነገር ደግሞ ፌስቡክ ላይ ፖስት የተደረጉትን ማየት ብቻ ሳይሆን ፖስት በተደረጉ ጉዳዮች ላይ የተጻፉ አስተያየቶችን ማየትም በጣም ጠቃሚ ነው፡፡ በተለይ ደግሞ ፖስት የተደረጉ ሐሳቦች ፖለቲካዊ ከሆኑ የአስተያየት ሰጪዎች ብዛት ይጨምራል፡፡ አንዳንዴማ ምን አስባለሁ መሰላችሁ ምን ነው ይህን ሁሉ አስተያየት መሪዎቻችን ቢያዩት የሚል ሐሳብ ድቅን ይልብኛል፡፡ ከዚህ መረዳት የምንችለው ነገር ቢኖር እነዚህ አስተያየት የሚጽፉ ሰዎች ደግፈውም ይሁን ተቃውመው ሐሳቡ በውስጣቸው እንደነበረና እንዴት መግለጽ እንደሚችሉ ሲያስቡ እንደነበር አያጠራጥርም፡፡ ምን አለበት ከዚህ ሁሉ ድግስ ትንሽ በጋዜጦችና በሬዲዮኖች ላይም ጣል ብናደርግባቸው? እውነቴን ነው የምላችሁ ጋዜጦችና ሬዲዮኖቻችን እኮ በመረጃና በነፃ ሐሳብ ድርቅ ተመትተዋል፡፡ ፌስቡክ ላይ የዘነበው ጋዜጦችና ሌሎች ሚዲያዎቻችን ላይ እንዴት አያካፋም? ምናልባትም ጃንሆይ ያሠሩትና አንድ ለእናቱ የሆነው ማተሚያ ቤት ፌስቡክ ላይ ፖስት አላስደርግም ማለት ስለማይችል ይሆን እነዚህ ሁሉ ሐሳቦች በነፃነት የሚንሸራሸሩት? ወይስ እኛ ፌስቡክ ካልሆነ ሐሳብ የሰጠን አይመስለንም? ከሆነ ግን ይገርማል፡፡

የዚህ ማተሚያ ቤት ነገር ከተነሳ አይቀር አንድ ነገር ትዝ አለኝ፡፡ እንደሚታወቀው ማተሚያ ቤቱ ሁለት ጋዜጦችን በቅርቡ ቀይ ካርድ አሳይቷቸዋል፤ ያውም ቢጫ ሳያሳይ ቀጥታ ቀይ፡፡ ቆይ ግን ምን ዓይነት “ፋዎል” ቢሠሩ ነው እንደዚህ የጨከነባቸው? በተለይ ግን የሁለተኛዋ ጋዜጣ ለምን ቀይ ካርድ እንዳየች ስትጠየቅ ከአዘጋጁ የተሰጠው መልስ በጣም አስገርሞኛል፡፡ በአንድ ጋዜጣ ተጠይቆ ሲመልስ ጋዜጣዋ የታገደችው ትክክለኛ ጽሑፍ ስላልያዘች ነው እንደተባለ ጠቅሷል፡፡ እንዴ ይህ ቅድመ ምርመራ (ሳንሱር) የሚባለው ተመልሶ መጣ ብዬ ውስጤ በጣም ጠረጠረ፡፡ መልስ ግን አላገኘሁም፡፡ አይ ፌስቡክ ሳንሱር የለ፣ አላትምም የለ፣ ምን ገዶ ሐሳብን በነፃነት ቦግ ማድረግ ብቻ፡፡ ግን እነዚህ በድፍረት የሕዝብን ሮሮ የሚያስደምጡንና መንግሥት ስህተት ከሠራ አሠራሩን እንዲያስተካክል የሚተቹ ጋዜጦች ቀይ ካርድ እያዩ ካለቁ አመራሮችስ እንዴት ነው ሥራቸውን የሚገመግሙት? መስተካከል ያለበትንስ ማን ይነግራቸዋል ብዬ አሰብኩ፡፡

እውነቴን እኮ ነው መቼም ደፍሬ እነርሱም ፌስቡክ አካውንታቸው ላይ ፖስት የሚደረጉ ነገሮችን ይመልከቱ አልልም፡፡ ቢመለከቱ ስህተት ነው እያልኩ ሳይሆን በመጀመሪያ የፌስቡክ አካውንት ላይኖራቸው ይችላል፡፡ ሌላው ደግሞ አካውንት ቢኖራቸውስ የፌስቡክ ጓደኞቻቸው ሌሎች ጥቂት ባለሥልጣናት እንጂ ተራው ሕዝብ ሊሆን አይችልም፡፡ ግን ይህን ቢያደርጉት ትክክለኛ የሕዝብን ስሜት መረዳት ይችሉ ነበር፡፡ እውነት ለመናገር የካድሬ ሪፖርት ብቻ ከማየት እንደ ፌስቡክ ባሉ አጋጣሚዎች የተራውን ሕዝብ ስሜት መረዳት የአመራር ብቃትን ይጨምራል እንጂ አይቀንስም፡፡ መቼም ሥራ አጥተዋል ወይ እንዳንተ ፌስቡክ የሚከፍቱልህ ልትሉኝ ትችሉ ይሆናል፡፡ ግን የሕዝብን ሐሳብ ከማየት የበለጠ ለአገር ገንቢ ነገር የለም እላለሁ፡፡

ሐሳቤን ሳጠቃልል ይህ በፌስቡክ ላይ ያለ ሐሳብንና መረጃን በነፃነት የመግለጽ ባህል ለምን በጋዜጦቻችንና በኤሌክትሮኒክስ ሚዲያዎች ላይ አይዳብርም? ጋዜጦች ተዘጉብን ብለን ማማረር ብቻ ሳይሆን የቀሩትም እስኪዘጉ ድረስ ያለንን ሁሉ ሐሳብ በነፃነት ባሉት ጋዜጦቻችን መግለጽ መቻል በጣም ጠቃሚና ትምህርት ሰጪ ነው፡፡ ሐሳብን በነፃነት የመግለጽ መብት የተደነገገው ለፌስቡክ ብቻ ነው? እንደኔ እንደኔ ቀይ ካርድ ባላዩ ጋዜጦቻችንና ሌሎች ኤሌክትሮኒክስ ሚዲያዎቻችን ይህን ዕድል ልንጠቀምበት ይገባል፡፡

ከአዘጋጁ፡-  ጸሐፊውን በኢሜይል አድራሻቸው esksta@gmail.com ማግኘት ይቻላል፡፡

በበላይ ዓለሙ
ይህችን አጭር ጽሑፍ እንድጽፍ ያነሳሳኝ ጳጉሜን 3 ቀን 2004 ዓ.ም. ማታ በአሜሪካ ድምፅ ሬዲዮ ጣቢያ የተላለፈው የአቶ ተስፋዬ ሐቢሶና የቅንጅት አባል የሆኑ ግለሰብ ውይይት ነው፡፡ ከጳጉሜን 3 ቀን በፊት ሁለት ግለሰቦች ያደረጉት ውይይት ካለ አልሰማሁምና አስተያየት መስጠት አልችልም፡፡

በዕለቱ በተደረገው ውይይት ሁለት ተፃራሪ ስሜቶች ናቸው የተሰሙኝ፡፡ አንደኛው መልካም ስሜት ሲሆን፣ ሌላኛው ግን ተቃዋሚዎቻችን እነዚህ ናቸው? እነዚህ ናቸው የአገራችን ተስፋዎች? የሚል የተስፋ መቁረጥ ስሜት ነው፡፡ በእርግጥ የቅንጅቱ አባል የተናገሩት የግል አቋማቸውን ይሁን የድርጅታቸውን መለየት ቢያስቸግርም፣ የሳቸውን የሚመስል ተመሳሳይ አቋም ከሌሎችም አንቱ ከተሰኙ ተቃዋሚዎች የሰማሁ ስለሆነ፣ የድርጅቱ አቋም ሊሆን ይችላል የሚል ኃይለኛ ጥርጣሬ ጭሮብኛል፡፡

የምሽቱ ውይይት ያተኮረው በቅርቡ በሞት የተለዩንን የጠቅላይ ሚኒስትር መለስ ዜናዊን አመራርን በተመለከተ ነበር፡፡ በእርግጥ አቶ መለስ ዜናዊን የሚያደንቋቸው ብዙ ኢትዮጵያውያንና የውጭ አገር ዜጎች እንዳሉ ሁሉ፣ በኃይለኛ የሚነቅፏቸውም በርካቶች ናቸው፡፡ በእነዚህ ሁለት ጽንፎች መሀል ያሉም አሉ፡፡

በምሽቱ በተደረገው ውይይት አቶ ተስፋዬ የኢሕአዴግ አባልና ደጋፊ ሳይሆኑ ስለ አቶ መለስ የሰጡት አስተያየት እጅግ አስደምሞኛል፡፡ በአንፃሩ የቅንጅት አባሉ የሰጡት አስተያየት እኚህ ሰው በእውነት የኢትዮጵያን ሁኔታ የተረዱ ሰው ናቸው ወይ? በእንደዚህ ዓይነት የተሳሳተ አመለካከት ነው ወይ አገርን መምራትና ሕዝብን ማሰለፍ የሚቻለው? አስብሎኛል፡፡ የጠራ የፖለቲካ መስመር ተጨባጩን አገር አቀፋዊና ዓለም አቀፋዊ ሁኔታን በትክክል ከመገንዘብ ስለሚመነጭ፣ ምን ዓይነት መስመር ይሆን እነዚህ የተቃዋሚ ድርጅቶች የሚቀይሱልን የሚል ሥጋት አሳድሮብኛል፡፡

‹‹አቶ መለስ ዜናዊና ድርጅታቸው ኢሕአዴግ በኢትዮጵያ የብሔር ብሔረሰቦችን መብት ከሞላ ጎደል አስከብረዋል፤ በአገሪቱ አንፃራዊ ሰላም አስፍነዋል፤ ከዜሮ በታች የነበረውን የአገሪቱን ኢኮኖሚ ሊካድ በማይቻል መልኩ አሳድገዋል፤ በአጎራባች አገሮች የሰላምን ተልዕኮ ፈጽመዋል፤ በታላላቅ የዓለም መድረኮች የአፍሪካና የኢትዮጵያ አፍ ሆነው አስደናቂ ሥራ ሠርተዋል፤ ኢትዮጵያ ዲሞክራሲያዊ ሕገ መንግሥት እንዲኖራት አድርገዋል፤›› ሲሉ ነበር አቶ ተስፋዬ ስለ ጠቅላይ ሚኒስትር መለስ ዜናዊ አመራር ያላቸውን ግንዛቤ ያቀረቡት፡፡ ‹‹ከዚህ በተጨማሪም የአቶ መለስ መንግሥት ጎደሎ የሌለው መንግሥት ነው ብዬ አላምንም፤ ሊሠሩ፣ ሊሻሻሉ የሚገባቸው ነገሮች እንዳሉ ሁነው አገር መምራት ቀላል እንዳልሆነ ልናውቅ ይገባናል፡፡ መልካም የሆኑትን መካድ ወይም አክብሮት አለመስጠት አይጠቅምም፤ የጎደለውን ደግሞ መሙላት የኢሕአዴግ ብቻ ሳይሆን የሁላችንም ኃላፊነት ነው፤›› ሲሉ ነበር ሐሳባቸውን ከሞላ ጎደል ያቀረቡት፡፡

ውይይታቸውን ያደመጠ አንድ ግለሰብ ኢሕአዴግ ዲሞክራሲያዊ ነው ብለው ያምናሉ ወይ ከሆነስ እንዴት? ካልሆነስ ለምን ሊሆን አልቻለም? ብሎ ለጠየቃቸው ሲመልሱ፣ ‹‹እኔ የኢሕአዴግ አባል ስላልሆንኩ ድርጅቱ ዲሞክራሲያዊ ይሁን አይሁን አላውቅም፡፡ በአገራችን ዲሞክራሲ እንዳይስፋፋ ችግር የሆነው ኋላቀርነታችን ጭምር ነው፡፡ ዲሞክራሲ የሕይወት ዘይቤ ነው ስለዚህ ኋላቀር በሆነ ኅብረሰብ ዲሞክራሲን ማስፈን ከባድ ነው፤›› ብለዋል፡፡

የቅንጅቱ አባል ለዚህ ለአቶ ተስፋዬ አስተያየት የሚሉት ነበራቸው፡፡ ‹‹አቶ መለስ ለአገር ዳር ድንበር ግድ የማይሰኙ ኢትዮጵያዊነታቸው የሚያጠራጥር መሪ ነበሩ፡፡ አገሪቷዋንም በዘር ከፋፍለው ከአንድነትና ከሰላም ይልቅ መለያየትንና ግጭትን ያሰፈኑ፣ ከአገራቸው አልፈው በሌሎች አገሮች የውስጥ ጉዳይ እየገቡ አገርን የወረሩ መሪ ናቸው፡፡ ለሰላም የተላከውም የኢትዮጵያን ጦር በዶላር የሚያከራዩ ከመሆናቸው ባሻገር የአገሪቱም ኢኮኖሚ አደገ ለማለት አይቻልም፤ የተሠራው መንገድና ፎቅ ነው፡፡

እውነተኛ የኢኮኖሚ ዕድገት ከጠቅላይ ሚኒስትሩም እንደሰማሁት ኢንዱስትሪ በብዛት ሲኖር ነው፡፡ የዓለም መሪዎችም በተለይ የአፍሪካ መሪዎች አቶ መለስን ቢያደንቋቸው አይደንቀኝም፤ አምባገነን አምባገነንን ማድነቁ አዲስ አይደለም፤›› ብለዋል ከሞላ ጎደል፡፡

ይህን ጽሑፍ የማዘጋጀት ሐሳብ ስላልነበረኝ ውይይታቸውን በድምፅ መቅረጫ አልቀረፅኩትም፡፡ ስለዚህም አንኳር ሐሳባቸውን እንጂ ሁሉን ነገር መዳሰስ ስላልቻልኩ ይቅርታ እጠይቃለሁ፡፡

ከዚህ በመቀጠል በዚህ ላይና በተዛማጅ ሐሳቦች ላይ ያለኝን ሐሳብ በጥቂቱ አቀርባለሁ፡፡ ዓላማዬ የኢሕአዴግን ፖሊሲና ዕቅድ የማብራራት፣ ደግሞም በምሽቱ ለተነሱት ነጥቦች ሁለ አመለካከቴን ለማቅረብ ሳይሆን የፖለቲካ ባህላችንን እንድንፈትሽ በጥቂቱ ለማሳየት ነው፡፡

መቼም አቶ መለስና ድርጅታቸው ኢሕአዴግ ምንም መልካም ነገር ለኢትዮጵያ አላደረጉም የሚል ግለሰብም ሆነ ድርጅት ካለ፣ በእርግጠኝነት መናገር የምችለው እየተነጋገርን ያለነው ይህች ኢትዮጵያ ብለን የምንጠራት እኛ የተወለድንባት፣ ያደግንባትና አሁን እየኖርንባት ያለችውን በምሥራቅ አፍሪካ በምትገኘው አገር ሳይሆን፣ ሌላ ደግሞም አቶ መለስና ድርጅታቸው ይህችን አገራችን ኢትዮጵያ እያልን የምንጠራትን እየመራ ያለ ድርጅት ሳይሆን ሌላና የሌላ መሆን አለበት ብዬ አምናለሁ፡፡

አቶ መለስና ድርጅታቸው ኢሕአዴግ ፋሽስታዊ ደርግን ለመጣል በተደረገው መራራ ትግል ውስጥ ግንባር ቀደሙን ሥፍራ የያዙ ናቸው፡፡ ይህን የተከፈለ ዋጋ ማጣጣልና ለድርጅቱም የሚገባውን የክብር ሥፍራ አለመስጠት ከፍፁም ጥላቻ የሚመነጭ አመለካከት ወይም ደርግ ኢሠፓነት ነው እንጂ ሌላ አልለውም፡፡ ትውልድ እንደ ውሻ አስከሬኑ በአስፋልት ላይ ሲጣል፣ የሕዝቦች ደም በየገደሉና ሜዳው ሲፈስ፣ ወላጆች ጠዋሪ ቀባሪያቸውን በርስ በእርስ ጦርነት ሲያጡ፣ ሕዝብ ያለ ፍርድ ሲታረድ፣ ትግል ብለው የጀመሩ ድርጅቶችን በአንድም በሌላ ምክንያት ደርግ ቁርስና ምሳ ሲያደርጋቸውና ሲፈራርሱ፣ የተረፈው ኑሮውን ለማሳካት ትግል በቃኝ እያለ ወደ አሜሪካና አውሮፓ ሲያቀና፣ ከአገር መውጣት ያልቻለውም ወደ ዩኒቨርሲቲውና ወደየሥራው ገብቶ ኑሮውን ሲያሞቅ፣ በፅናትና ተስፋ ባለመቁረጥ የትግል መስመርን ቀይሶ ግዙፉን የደርግ ሠራዊት ያሽመደመደና የደርግ መንግሥትን የደመሰሰው ኢሕአዴግ ነው! ይህን መካድ ለዚህ ስኬት ለተከፈለው ዋጋ ዕውቅና አለመስጠትና የሚያሳዝን ነገር ነው፡፡ የብዙዎቹ የ60ዎቹ ፖለቲከኞች ትልቁ በሽታ ይህ ነው፡፡

መልካም የሆኑትን የተቃዋሚ ድርጅት ክንውኖችን ጎሽ አለማለት፡፡ ጭፍን የሆነ ድጋፍና ጭፍን የሆነ የተቃውሞ ባህል፡፡ ይህ በሽታ ዛሬም መኖሩን ስመለከት ለልጆቻችን የምናወርሰው ባህል ይህንኑ ነው? እላለሁ፡፡

በአገሪቱና በአካባቢው አገሮች ሰላምን ለማስፈን የተደረገውን ጥረት ዶላር ለማግኘት የተደረገ ዕርምጃ ነው ብሎ መደምደም አስቸጋሪ ነው፡፡ መቼም የሰላም አስከባሪው ኃይል በነፃ ይሰማራ የሚል ጥያቄ ይኖራል ብዬ አልገምትም፡፡

‹‹የሚያበራየውን በሬ አፉን አትሰር›› ተብሎ የለ? ለምን ተኬደ የሚባል ከሆነም ያሳዝናል፡፡ ፕሬዚዳንት ቢል ክሊንተን በዘመነ ሥልጣናቸው ከሚያዝኑበት ነገር አንዱ በቱትሲና በጡቱ ጎሳዎች መካከል በተደረገው የ100 ቀን ግጭት ወደ ሚሊዮን የሚጠጉ ሰዎች ሲያልቁ መንግሥታቸው ምንም ለማድረጉ እንደሆነ እኚሁ መሪ ከሥልጣን ከወረዱ በኋላ ገልጸዋል፡፡ ለአፍሪካውያን ወገኖቻችን ሰላም የድርሻችንን ብናደርግ ሌላው ቢቀር ከሞራል አንፃር እንኳን ተገቢ ብቻ ሳይሆን የሚያኮራ ነው ብዬ አምናለሁ፡፡

ሶማሊያን በተመለከተ አቶ መለስና ድርጅታቸው የወሰዱት አቋምና ዕርምጃ አግባብነት ያለው፣ ይህም ዕርምጃቸው ኢትዮጵያ በፀረ ሽብርተኝነት ላይ ያላትን ፅኑ አቋም ለዓለም ኅብረተሰብ ያሳየችበትና ደምቃ የወጣችበት ነው፡፡ በዋቢ ሸበሌ ሆቴል፣ በፖስታ ቤት፣ በየታክሲው፣ በሐረር ራስ ሆቴልና በሌሎችም ሥፍራዎች አሊትሃድ የሽብር ተግባር ሲፈጽም ችግሩን ከምንጩ ለማድረቅ ነበር ወደ ሶማሊያ የተገባው፡፡

በወቅቱም አሜሪካን ጨምሮ ሌሎች አገሮች ዕርምጃውን በፅኑ ቢቃወሙም የኢትዮጵያ መንግሥት ግን ጆሮ ዳባ ልበስ በማለት ብቻ ሳይወሰን፣ ችግሩን ለዓለም ኅብረተሰብ ለማሳየት ያላሰለሰ ጥረት አድርጎ በኋላም የችግሩን እውነተኛነትና አደጋ የተገነዘበው የዓለም ኅብረተሰብ ከኢትዮጵያ መንግሥት ጎን ሊቆም ችሏል፡፡ አልሸባብ የተባለው ሽብርተኛ ቡድን በኢትዮጵያ ላይ የጅሃድ ጦርነት በይፋ ሲያውጅ እንደ ኢትዮጵያዊ ይህንን ድርጅት ለመዋጋት አለመቆምና የተወሰደውን ዕርምጃ አለመደገፍ የታሪክ ስህተትን መድገም ነው (በኢትዮ ኤርትራና በደርግ ጊዜ በተካሄደው የኢትዮ ሶማሊያ ጦርነት ወቅት የአንዳንድ የፖለቲካ ድርጅቶችን አቋም ያስቧል)፡፡

የኢትዮጵያና የአፍሪካ ኅብረት ጦር አልሸባብን በመዋጋትና በሶማሊያ ሰላምን አስፍኖ ወደ ዲሞክራሲያዊ ምርጫ እንድትጓዝ ለተከፈለው የደም ዋጋ የሶማሊያ ሕዝብ የኢትዮጵያና የሌሎች አፍሪካ አገሮች ውለታ አለበት፡፡

ስለ ኢኮኖሚው ዕድገት እውነተኛነት፣ በትምህርት፣ በጤና፣ በመንገድ፣ በእርሻ፣ በኢንዱስትሪና በሌሎችም የተገኘውን ዓለም ሁሉ የመሰከረው ስለሆነ እዚህ ላይ ማንሳት አያስፈልገኝም፡፡

ሌላው ያልተገጸው የአቶ መለስና ድርጅታቸው ኢሕአዴግ ሊመሰገኑበት የሚገባው ክንውን የሃይማኖት ነፃነትና ከአገር ወደ አገር የመዘዋወርን ነፃነትን ማስከበራቸው ነው፡፡ ከአገር ወደ አገር መዘዋወርን በተመለከተ የተገኘውን ነፃነት ያጣጣሙት በአሜሪካና በአውሮፓ ያሉት ወገኖቻችን ስለሚያውቁት ብተወው ይሻላል፡፡

በደርግ ዘመን እንኳን ከኢትዮጵያ ውጭ በአገር ውስጥም ጉዞ አስቸጋሪ እንደነበር አንረሳም፡፡ በደርግ ዘመን የአምልኮ ነፃነታቸውን ተነፍገው ንብረታቸው የተወረሰባቸውና ለእስር ሲዳረጉ የነበሩ በሚሊዮን የሚቆጠሩ የፕሮቴስታንት እምነት ተከታዮችና ቤተ እምነቶች ለተሰጣቸው የእምነት ነፃነት በመጀመርያ ፈጣሪያቸውን፣ ቀጥለውም አቶ መለስንና ድርጅታቸውን ከልብ ያመሰግናሉ፡፡ ጠቅላይ ሚኒስትሩ ከሕመማቸው ድነው ወደ አገር እንዲመለሱ ማንም ሳያስገድዳቸውና ሳይቀሰቅሳቸው በፈቃዳቸው ያደርጉ የነበረውን በዕንባ የተሞላ ፀሎት የተመለከተ ሰው፣ ይህ ሕዝብ ውለታውን የማይረሳ ነው የሚያስብል ነው፡፡

በዚህ መካከል ደግሞ አቶ መለስና ድርጅታቸው ኢሕአዴግ ሊያደርጓቸው የማይገቡ፣ ደግሞም ሊሠሯቸው የሚገቡ ለአገር የሚጠቅሙ ክንውኖች እንዳሉ አለመቀበል ደግሞ የዚያኑ ያህል ጭፍን ደጋፊነትን ያሳያል፡፡ ዲሞክራሲን ከዚህ በላይ መገንባት ከኢሕአዴግ ብዙ ይጠበቃል፤ ጥቅሙ ለሁሉም ነው፡፡ ይህን ተገንዝቦ በሚያልፍ ሕይወት የማያልፍ ታሪክ ሠርቶ ማለፍ እንዴት ያስደስት ይሆን?

አቶ ተስፋዬ ዲሞክራሲ በአገራችን እንደሚገባው ያላደገበት ምክንያት በኋላቀር ባህላችን ነው ያሉትን እስማማለሁ፡፡ ይህ ደግሞ የቅንጅቱ አባል እንዳሉት ሕዝብን መናቅ አይደለም፡፡ እንዲያውም ሕዝብ ያልሆነውን ነህ ማለት ይመስለኛል ንቀት፡፡ እያሞኘኸው እንደሆነ እንደማይረዳ ቆጥረኸዋልና፡፡

በአገራችን ዲሞክራሲያዊ ባህል እንዳያድግ ካደረጉት ተጨማሪ ምክንያቶች አንዱ ፖለቲከኞቻችን በማርክሳዊ ሌኒናዊ ርዕዮተ ዓለም የተጠመቁ መሆናቸው አስተዋጽኦ አለው እላለሁ፡፡ ተቃዋሚን እንደ ጠላት የሚፈርጀው ይህ ርዕዮተ ዓለም ተቃዋሚን በጥይት እንጂ በውይይት ለመርታት አይፈጥንም፡፡ አሁንም የምናየው የስም ማጥፋትና እስር የዚህ ውልድ ነው፡፡ ለመሆኑ ዛሬ በሠለጠነው አገር የሚኖሩ የተቃዋሚና የኢሕአዴግ ደጋፊዎች እንደ አገር ዜጋ ይተያያሉ? እንዲያው እውነቱን እንነጋገርና በአሜሪካ የኢሕአዴግ ደጋፊዎች የተቃዋሚዎች ወከባ፣ ግልምጫና ስም ማጥፋት ሳይደርስባቸው በነፃነት ሐሳባቸውን ያራምዳሉ? ኢሕአዴግን የመደገፍ አዝማሚያ ያለው አርቲስት በአሜሪካና በአውሮፓ መልካም አቀባበል ይደረግለታል?

ከዚህ በተጨማሪ የሕዝቡ አለመደራጀት ዲሞክራሲያዊ ባህል እንዳይዳብርና ለዲሞክራሲያዊ መብት በፅኑ እንዳይታገል እንዳደረገው መካድ አይቻልም፡፡ ለተቃዋሚዎችም ትልቁ የቤት ሥራ ይህ ይመስለኛል፡፡ ዋጋ ከፍሎ ከቀበሌ ጀምሮ እስከ ላይ ድረስ ማደራጀት፡፡ ዋጋ ሳይከፍልና ሕዝብ ሳይደራጅ ሥልጣን መያዝ በአጋጣሚ ካልሆነ በስተቀር አይቻልም፡፡ በአጋጣሚም ቢያዝ የሚመሠረተው መንግሥት ፅኑ ዲሞክራሲያዊ መንግሥት ሊሆን ያዳግተዋል፡፡

እንዳንደራጅ ኢሕአዴግ አላሠራንም መቼም አይባልም፡፡ ለነገሩ ኢሕአዴግም ተቃዋሚውን እንደ ጠላት ስለሚያየው ይህን ለማድረግ ወደ ኋላ የሚል አይመስለኝም፡፡ ነገር ግን ለመብትና ለነፃነቴ መደራጀት አለብኝ ብሎ ዋጋ የማይከፍል ትውልድ ከሆነ ይህ ትውልድ፣ እንግዲያው ሌላው ዋጋ በከፈለበት ነፃነትን ሊጎናፀፍ የሚሻ ነውና ቆም ብሎ እንደ ሻማ ለመቅለጥ መወሰን፣ ወይም ደግሞ መተው ይሻል ይመስለኛል፡፡ እኔ ግን የመብት ረገጣ እስካለ ድረስ ለመረገጥ ፈቃደኛ ያልሆነ ሕዝብ ይኖራል ብዬ አምናለሁ፡፡ መቼም ሁሉም ለመብቱ እኩል ተቆርቋሪ ላይሆን ይችላል፡፡ ‹‹ጎመን በጤና›› የሚልም አይጠፋም፡፡ ቁምነገሩ ያለው ሕዝቡን በጠራ የፖለቲካ መስመርና ባህል በሩቅ አስቦ አሁን ሥራን በትጋት መወጣት ላይ ነው፡፡ የኢትዮጵያ አብዮት ሁሌም ችግሩ ነባራዊና ህሊናዊ ሁኔታ አለመዛመድ ነውና፡፡ ስለዚህ ሕዝቡን ማደራጀት ትኩረት ሊሰጠው ይገባል፡፡ የተደራጀ ሕዝብ ምን ዓይነት ዋጋ እንደሚከፍል የቅርብ ጊዜ ትዝታችን ነው፡፡ ደርግን ለመፋለም ያንን ሁሉ ዋጋ የከፈለው ትውልድ የተለየ ትውልድ ሆኖ አይደለም፤ የተደራጀ እንጂ፡፡ የ1997 ዓ.ም. ምርጫን ተመልክቶ በአገራችን የተነሳው እንቅስቃሴ በቀላሉ የተዳፈነው በበቂ የተደራጀ ሕዝብና በሳል አመራር ባለመኖሩ እንደሆነ ይታመናል፡፡

በመጨረሻም አቶ መለስና ድርጅታቸው ለዚህ ሕዝብና አገር ታላቅ ውለታ የሠሩና እየሠሩ ያሉ ናቸው፡፡ ተቃዋሚ ነን የሚሉ ወገኖች ይህንን መካድ አይገባቸውም፤ (ለነገሩ ሁሉም ተቃዋሚ አይክድም) አለመካድ ብቻ ሳይሆን በጥሩ ክንውኖች ላይ ማበረታታትና ከጎን መቆምን ሊያስተምሩን ይገባል፡፡ ዛሬ እኛ ያላደረግነውን ልጆቻችን ከየት አይተው ያደርጉታል? ከአሜሪካ ሕዝብ ሳይሆን ከእኛው ከአባቶቻቸው ይህን እየተማሩ ማደግ አለባቸው፡፡ በተረፈ ግን የጠራ የፖለቲካ መስመር ለመያዝ ተጨባጩን የኢትዮጵያና የዓለም አቀፍ ሁኔታ በአግባቡ ማወቅ እጅግ አስፈላጊ ስለሆነ፣ ተፎካካሪዎች ይህን አጥብቀው ቢመለከቱት እመክራለሁ፡፡ (አንተን ማን መካሪ አደረገህ ካልተባልኩ!)

እግረ መንገዴን አንድ የታዘብኩትን ነገር ልንገራችሁ፡፡ ብዙዎች የኢሕአዴግ የቀድሞ አባላት ስለ አቶ መለስ አመራር፣ ብሩህ አዕምሮና ስትራቴጂስትነት ሲናገሩ፣ እንዴት አድርገው ድርጅቱን ከጠባብ ብሔርተኛነት ትግል ወደ ብሔራዊ ትግል እንደቃኙት፣ ከማርክሳዊ ሌኒናዊ (አልባኒያኒዝም) ርዕዮተ ዓለም አቀንቃኝነት ወደ ቀኝ ኃይል እንዴት ዘመም እንዳደረጉት፣ የደርግ ሠራዊትን ለመጣልና የሻዕቢያ ወረራን ለመቀልበስ ዋና ወታደራዊ ስትራቴጂስት እርሳቸው እንደነበሩ ሲናገሩ፣ ለዚህ ሁሉ ነገር በእርግጥ እርሳቸው ብቻ ነበሩ ባለ ራዕይ? ብዬ እንድጠይቅ ተገድጃለሁ፡፡ በእርግጥ ለሁሉም ጉዳይ ባለ ራዕይና ቀዳሚ ቀያሽ እርሳቸው ብቻ ከነበሩ፣ የሞቱት አቶ መለስ ዜናዊ ብቻ ሳይሆኑ ኢሕአዴግም ነው አስብሎኛል፡፡ ከዚህም ተነስቼ ኢሕአዴግ በቀደመው ጥንካሬ እንዲጓዝ ትልቅ የቤት ሥራ ከፊቱ እንዳለ መገንዘብ ያለበት ይመስለኛል፡፡ መቼም መሪን ከሁሉ ነገር በላይ ትልቅ የሚያደርገው ተተኪዎችን ማፍራት መቻሉ ነውና አቶ መለስ ተተኪዎችን አዘጋጀቱው ከሆነ በእርግጥም ታላቅ መሪ ነበሩ፡፡

አቶ ክፍሉ ታደሰ የተባሉ የኢሕአፓ ማዕከላዊ ኮሚቴ አባል ‹‹ያ ትውልድ›› በተሰኘ መጽሐፋቸው ‹‹የፓርቲው ዋና ፀሐፊ የአቶ ተስፋዬ ደበሳይን ሞት ስንሰማ የማዕከላም ኮሚቴ አባላት ሁላችንም ኢሕአፓ በቀድሞ ወቡቱና ጥንካሬው መቀጠል እንደማይችል በልባችን ተገንዝበን ነበር፤›› አሉ፡፡ ለኢሕአዴግም ሆነ ለተፎካካሪዎች ይህን አልመኝም፡፡ ኢትዮጵያ ጠንካራ መሪዎች ያሉባት ተፎካካሪ ድርጅቶች በእጅጉ ያስፈልጓታልና፡፡ ለመሆኑ መቼ ይሆን የፖለቲካ ባህላችን የሚለወጠው? እኛ ካልጀመርነው ማን ይሆን የሚጀምርልን?
ቸር ይግጠመን፡፡