POWr Social Media Icons

Saturday, September 15, 2012

New

አዲስአበባ፣መስከረም5 2005 (ኤፍቢሲ) የኢህአዴግ ምክር ቤት አርብና  ቅዳሜ  ባደረገው መደበኛ  ሰብሰባው የግንባሩን ሊቀመንበርና ምክትል ሊቀመንበር መረጠ ።

ምክር ቤቱ   አቶ  ሀይለማሪያም ደሳለኝን  የግንባሩ ሊቀመንበር አድርጎ  የመረጠ  ሲሆን ፥  አቶ  ደመቀ መኮንንን  ደግሞ በምክትል ሊቀመንበርነት መርጧል ።

የምክር ቤቱ መደበኛ ሰብሰባ ውሳኔዎችን በተመለከተ ፓርቲው  ማምሻውን በሰጠው ጋዜጣዊ መግለጫ  ቅዳሜ ከሰዓት  በኋላ  በተደረገው  የአመራር  ምርጫ  አቶ ሀይለማሪያም ደሳለኝ ከቀረቡት ሶሰት እጩዎች  መካከል ሙሉ  ድምፅ  በማግኘት ሊቀመንበር ሆነው ተመርጠዋል ።

በመግለጫው ላይ እንደተመለከተውም የአመራር  ምርጫው ከመካሄዱ በፊት  የኢህአዴግ ምክር ቤት አባላት ቀደም ሲል ፓርቲው ባስቀመጠው የመተካካት እቅድ መሰረት ምርጫው እንዲካሄድ  ተስማምተዋል ።

በቀደመው አመራር የተጀመረው  ትግል የሚቀጥለው የተለያዩ  ትውልዶች ተቀበብለውት እንደሆነ በማስመርም  የህዳሴው አመራር ሙሉ  በሙሉ  ከአዲሱ  ትውልድ  እንዲሆን  በመወሰን እጩዎች እንዲቀርቡ መደረጉን ነው የኢህአዴግ ስራ አስፈፃሚ ኮሚቴ አባልና  የመንግስት ኮሙኒኬሽን ጉዳዮች ሚኒስትር አቶ በረከት ስምዖን ያስረዱት  ።

አቶ በረከት በኢህአዴግ አሰራርም  አሁን በሊቀመንበርነትና በምክትል ሊቀመንበርነት የተመረጡት አመራሮች የኢፌዴሪ ጠቅላይ ሚኒስትርና ምክትል  ጠቅላይ ሚኒስትር  እንደሚሆኑም አመልክተዋል ።

አዲሱ ጠቅላይ  ሚኒስትርም በአገሪቱ  ህገ በመንግሰት መሰረት  ካቢኒያቸውን ማዋቀር እንደሚችሉ የገለፁት አቶ በረከት ፥  አቶ ሀይለማሪያም ደሳለኝም ከፓርቲያቸው ጋር በመመካከር ካቢኒያቸውን መልሰው ሊያዋቅሩም ሆነ ሊያስቀጥሉ እንደሚችሉ ነው ያመለከቱት ።
 
  

“የስዊድን ጋዜጠኞችስ ተፈቱ! የእኛስ?” (የነፃው ፕሬስ ጋዜጠኛ)
“ጠ/ሚኒስትር ለመሾም ምህላ እንጂ ስብሰባ ምን ይሰራል?” (ሽማግሌ ጐረቤቴ)
አዲስ ዓመት እንዴት ነበር? (ከዋጋ ንረቱ ውጭ ማለቴ ነው) እኔ የምለው … ለአውዳመቱ  በግ ስንት እንደገባ ሰማችሁ አይደል? … በግ ነጋዴውን ጠጋ ብላችሁ ስትጠይቁት ምን ይላችኋል መሰላችሁ? “24 ውሰደው!” ግራ ይገባችሁና “ምንድነው የምትለው?” ስትሉት “ሰምተሃል!” ብሎ ሊያሾፍባችሁ ይሞክራል፡፡ (“ሼፉ” ፊልም ላይ እንዳለችው ገፀባህርይ) “አትሸጥም እንዴ?” ትሉታላችሁ ኮስተር ብላችሁ! “በቃ ከ23 ውሰደው!” ይላችኋል - ፍርጥም ብሎ፡፡ ምን ማለት መሰላችሁ? 2300 ብር ማለቱ ነው፡፡ ይታያችሁ … አንድ በግ በ2300 ብር! ለነገሩ በጉ እንኳን ሊቀር ይችላል፡፡ የማይቀረው ምን መሰላችሁ? የጤፉ ነገር ነው፡፡ ጤፉ ሊቀር ይችላል የሚባል አይደለም (አበሻ ምን ሊበላ?) በአሁኑ አካሄድ ግን ለእነ ጤፍ ምትክ ካልፈጠርንላቸው የምንከርም አልመሰለኝም! ከእነሩዝ ጋር ዝምድና ብንፈጥር ነው የሚሻለን፡፡ (የቻይና ደጀ-ጠኚ አደረግኸን ካላላችሁኝ በቀር) መቼም ጤፍ ተወደደ ብለን የረሃብ አድማ አናደርግም! ሳንነጋገር እየራበን? የምን አድማ!
ይሄን ፅሁፍ እያጠናቀርኩኝ ሳለ በኢቴቪ “ሥነፆታ” በተባለ ፕሮግራም በዓሉን አስመልክቶ ተሞክሮአቸውን የሚያጋሩ ዘመናዊ ባልና ሚስት ቀርበው ነበር፡፡ ሚስት ሲናገሩ፤ ዳቦውንም ጠላውንም ራሳችን ካላዘጋጀነው ልንል አይገባንም፤ ሲሉ በሰጡት ምክራዊ አስተያየት “እኛ ለምሳሌ ዳቦ አንጋግርም… outsource ነው የምናደርገው… ለሌላው ሰው የሥራ እድል መፍጠር አለብን” ብለዋል፡፡ (ውጭ አስጋግረን ነው የምናመጣው ማለታቸው መሰለኝ) ያለው ማማሩ አሉ! ዕድሜ ለNGO! ያልፈጠረልን ቃል የለም፡፡ (አሜሪካ እስርቤትና ገራፊዎችን outsource ስታደርግ አይቶ ለሚቋምጥ ይብላኝለት!) ግን ስንቶቻችን ነን እንደሴትየዋ outsource (በውጭ ጉልበት ማስጋገር) ማድረግ የምንችለው? (እዬዬ ሲዳላ ነው! አሉ) እናላችሁ ይቺ outsource የምትባል ነገር ለጊዜው ትለፈን፡፡ ባይሆን መንግስት የአንዳንድ ዳተኛ ተቋማቱን አመራር outsource ማድረግ ይችላል (አቅም አለዋ!)
እኔ የምለው… እነዚያ ያለፈቃድ ድንበር ተሻግረው ወደ አገር ውስጥ ገብተዋል፤ እንዲሁም ከኦነግ ጋር ተባብረዋል በሚል ተከሰው የ7 ዓመት እስር የተበየነባቸው ሁለት ስዊድናዊ ጋዜጠኞች በነፃ መለቀቃቸውን ሰማችሁ? (በነፃ ሳይሆን በይቅርታ ማለቴ ነው!) እኔማ እሰይ፤ እንኳን ተፈቱ አልኩ፡፡ ግን ለፈረንጆቹ አዝኜላቸው እንዳይመስላችሁ (ለኒዮሊበራል አቀንቃኝ እንዴት ይታዘናል?) የእነሱ መፈታት ለአገር ገፅ ግንባታ ይጠቅማል ብዬ ነው፡፡ መቼም ከኢትዮጵያ እግራቸው ሲወጣ የሚያወሩት አይታወቅም እንጂ ከወህኒ እንደወጡ ለኢቴቪ ጋዜጠኛ እንደተናገሩት ከሆነ፣ እግር እስኪነቃ ዓለምን ቢያካልሉ እንደ ኢትዮጵያ ያለ ህዝብ፣ መንግስት፣ የእስር ቤት አያያዝ፣ የይቅርታ ባህል ወዘተ የትም አይገኝም ብለዋል፡፡ እንዲህ ያለ የፈረንጅ ምርቃት ከየት ይገኛል ጃል! (ብቻ ፉገራ እንዳይሆን!)
እኔ የምለው ግን… ለፈረንጆች ብቻ የተዘጋጀ ልዩ ወህኒ ቤት አለ እንዴ? ምን ላድርግ… ምስጋናቸው ሲበዛብኝ እኮ ነው፡፡ በዚህ ላይ ከእስር የተለቀቀ አንድም አበሻ እንደ ስዊድኖቹ የእስር አያያዙን ሲያመሰግን ገጥሞኝ አያውቅም (ለነገሩ አበሻ ጨለምተኛ አይደለ!)
የሆኖ ሆኖ እንኳንም አመሰገኑን … እኛም ታዲያ ለምስጋናቸው … ካባና ባህላዊ የሃገር ልብስ ሸልመን ብንሸኛቸው አይከፋም (ወይስ ሄደዋል?) ትንሽ ያሰጋኝ ምን መሰላችሁ? አገራቸው ሲገቡ “እኛ የተናገርነው ስለሌላ አገር የእስር ቤት አያያዝ እንጂ ስለ ኢትዮጵያ አይደለም” ብለው እንዳይሸመጥጡ ብቻ ነው! (ለነገሩ ኢቴቪ ድምፃቸውን ቀርፆት የለ!) የእኒህን ጋዜጠኞች ከእስር መፈታት የሰማ አንድ የነፃው ፕሬስ ጋዜጠኛ ወዳጄ ምን አለ መሰላችሁ? “የስዊድን ጋዜጠኞቹስ ተፈቱ… የእኛስ?” ብሎ አፈጠጠብኝ፡፡ (የኢህአዴግ ተወካይ እመስለዋለሁ እንዴ?) እኔም ግን ዝም አላልኩትም፡፡ አሰብኩ አሰብኩና “እሱማ ፖለቲከኞችም እኮ አሉ!” አልኩት፤ (በሽብርተኝነት ተከሰው የረዣዥም ዓመት እስር የተፈረደባቸው የተቃዋሚ ፓርቲ አባላትን ማለቴ ነው) (እድገታችን ዙሪያ ገብ እንዲሆን እኮ ነው!)
እኔ የምለው ግን … አዳዲስ ደረጃቸውን የጠበቁ ወህኒ ቤቶች የመገንባት ዕቅድ በአምስት ዓመቱ የዕድገትና ትራንስፎርሜሽን … ላይ አልተካተተም እንዴ? ሰሞኑን “ኢህአዴግ ጠ/ሚኒስትር እያሰሰ ነው!” የሚል ርእስ የሆነ ቦታ ወጥቶ አይቻለሁ፡፡ ለምን ያስሳል? ይመርጣል እንጂ! ሁለት ምክትል ጠ/ሚኒስትሮች ይሾማሉ የሚባል ወሬም ሰምቻለሁ፡፡ በአዲሱ የድህረ መለስ አስተዳደር ጠ/ሚኒስትሩና ምክትሉ እኩል ሥልጣን ይኖራቸዋል ሲባልም የሰማሁ መሰለኝ (አዲስ አገር ነው እንዴ የምናቋቁመው?) በኋላማ ኢህአዴግ - “በጠ/ሚኒስትሩ ህልፈት የተነሳ አንድም የሚለወጥ ነገር የለም” ሲል የተናገረው ትዝ አለኝና እፎይ አልኩ፡፡ ለነገሩ ምንም የሚያሰጋን ነገር እኮ የለም! (ዕድሜ ለህገ-መንግስታችን!) በሰላማዊ መንገድ የስልጣን ሽግግር ሲካሄድ በታሪካችን ለመጀመሪያ ጊዜ በመሆኑ ብቻ ነው ትንሽ የፈራነው (“የሥልጣን ባለቤት ህዝብ ነው!” የምትለዋን መፈክር ስወዳት!)
አንድ የ60ዎቹ የተማሪ አብዮት አቀጣጣይ የነበረ ወዳጄ፤ አንዱ ሁለት ሌላው ደግሞ ሦስት ጠ/ሚኒስትሮች ይሾማሉ እያለ ሲያወራ ሰምቶ ምን እንዳለ ታውቃላችሁ? “እኔ አስራ ሦስትም ጠ/ሚኒስትሮች ቢሾሙ ግዴለኝም… ብቻ በቅጡ ይምሩን!” (እሱም አበዛው - ለአንድ አገር 13 ጠ/ሚስትሮች? እጩዎቹ አራት አራት መሰሉት እንዴ? ወይስ ምርጫውን ህዝባዊ ማድረጉ ነው?)
የሹመት ነገር ሲነሳ ምን ትዝ አለኝ መሰላችሁ? የእንቁጣጣሽ እለት በኢቴቪ የተነገረው የመከላከያ አዛዦች የሹመት ዜና! (ተንበሸበሹ እኮ!) እኔን ያልገባኝ ግን … ኢቴቪ ምስል - አልባ  ዜና ማቅረቡ ነው! (ካሜራዎቹ ሁሉ ተበላሹበት ወይስ የካሜራ ባለሙያዎቹ ጠፉበት?) ሌላው ቢቀር በሞባይል የተነሳ ፎቶ እንኳን እንዴት ጠፋ? የኔ ነገር! ታሪክ ነው ብዬ እኮ ነው! (ትንፋሼ ተቀርፆ ይቀመጥ ማልቀሻ …ያለው ማን ነበር?)
ዘወትር ባገኙኝ ቁጥር ሦስት መንግስት በልቼአለሁ እያሉ የሚያደርቁኝ አንድ ጐረቤቴ አሉኝ (ጀግንነት መሰላቸው እንዴ?) “አሁንም ቤተመንግስቱ ባዶ ነው?” ሲሉ ጠየቁኝ፡፡ ጠ/ሚኒስትር አልተሾመም ወይ ሊሉ ፈልገው ነው፡፡ አዲሱ የአገራችን ጠ/ሚኒስትር የሚታወቀው ከኢህአዴግ ምክር ቤት ስብሰባ በኋላ እንደሆነ ነገርኳቸው… “ስብሰባ?” ብለው አምባረቁብኝ፡፡ “ስብሰባ ምን ይሰራል… በዚህ ጊዜ የሚያስፈልገው ምህላና ፀሎት ነው እንጂ!” አሉኝ ኮስተር ብለው፡፡ ሳቄን ለማፈን ሞከርኩ - ባይሳካልኝም፡፡ አዛውንቱ ግን የከሸፈውን ሙከራዬን አላጤኑትም፤ ስለዚህ ሃሳባቸውን ቀጠሉ “አልሰማህም እንዴ? አዲስ ፓትርያርክ ለመምረጥ ፀሎትና ምህላ እየተደረገ እኮ ነው” አሉኝ፡፡ ሃይማኖትና መንግሥት ለየቅል ናቸው ልላቸው ፈልጌ ውዝግብ ከመፍጠር በቀር ምንም ፋይዳ እንደሌለው አሰብኩና ዝምታን መረጥኩ፡፡ ያኔ ነው በፌስ ቡክ ላይ ፖስት የሚደረጉ በሚመስሉ ሃሳቦች የተጥለቀለቅሁት፡፡ ጉዳዩ ደግሞ ያው የፈረደበት የጠ/ሚኒስትሩ ሹመት ነበር፡፡ መጀመርያ ፕ/ር ኤፍሬም ይስሃቅ፤ “መለስ ሚኒስትሮችን ከተቃዋሚዎች የመሾም እቅድ ነበራቸው” ያሉኝ ትዝ አለኝና ተቆጨሁ (ባደረጉት ነበር ብዬ!) ግን አሁን ኢህአዴግ በሆነ ተአምር ከተቃዋሚ ጐራ ጠ/ሚኒስትር ቢያጭስ? ምን ትላላችሁ? (ልብ አድርጉ! ቢያጭ ነው ያልኩት) ቆየት ብዬ ኮሚክ ሀሳብ መጣብኝ፡፡ “ጠ/ሚኒስትር ከዳያስፖራ ያስስ ይሆን?” የሚል፡፡ እንዳትሳሳቱ … ኢህአዴግ ከዳያስፖራው ለጠ/ሚኒስትርነት የሚሆን ሰው የሚያፈላልገው ከራሱ ፓርቲ ሰው አጥቶ አይደለም፡፡ ሥልጣን የማጋራት የረዥም ጊዜ ህልሙን እውን ለማድረግ መልካም አጋጣሚ ነው በሚል ካለው ቀና አገራዊ አስተሳሰብ ነው፡፡ (የሥልጣን መተካካት በሚለው ስትራቴጂው እኮ ዓለም ያደንቀዋል!)
ይሄ ሁሉ እንግዲህ የእኔ የብቻዬ ሃሳቦች ናቸው፡፡ እውነቱን የምናውቀው ከኢህአዴግ የም/ቤት ስብሰባ ነው፡፡ ለፓርቲው ሊ/መንበርነትና ምክትል ሊ/መንበርነት የመረጣቸውን ሰዎች የምንሰማው ከእሱ ብቻ ነው፡፡ ብቻ የፓርቲዬ ባህል አይፈቅድልኝም ብሎ የሾማቸውን ከመግለጽ እንዳይታቀብ! (ባህሌ ነው ካለ ምን ይደረጋል?) መልካም ዘመን ለእኔም ለእናንተም፤ ለኢህአዴግም ለተቃዋሚዎችም እመኛለሁ፡፡

ከጠ/ሚኒስቴር መለስ ዜናዊ ዜና ዕረፍት ወዲህ በአዲስ አበባና በክልል ከተሞች በሚገኙ የመንግስት መስሪያ ቤቶች ውስጥ ስራ  እንደተቀዛቀዘ ባለጉዳዮች የተናገሩ ሲሆን፤ከፍተኛ ባለስልጣኖች ለስብሰባ አዲስ አበባ መምጣታቸው እና የተተኪ ጠቅላይ ሚኒስትር ሹመት ሳይካሄድ መቆየቱ ተጨማሪ ምክንያቶች ሊሆኑ እንደሚችሉ ተገልጿል፡፡
በየመስሪያ ቤቱ የመንግስት ስራ መቀዛቀዙን የሚገልፁ ባለጉዳዮች፤ በተለይ የከፍተኛ ባለስልጣናትንና የቢሮ ሃላፊዎችን ውሳኔ የሚጠይቁ ጉዳዮች በቀጠሮ እንደተጓተቱባቸው ተናግረዋል፡፡
የጠ/ሚኒስቴር መለስ ዜና እረፍት ከተሰማበት ወቅት አንስቶ እስከ እለተ ቀብር ድረስ በአገሪቱ የነበረው የሀዘን ስሜትና ድባብ ከፍተኛ ቢሆንም፤ የመንግስት ሥራ ሳይቋረጥና ቢሮዎች ሳይዘጉ ቀጥለዋል፤ ሆኖም ስራዎች መቀዛቀዛቸው አልቀረም ይላሉ ባለጉዳዮች፡፡
በቀብር ስነስርዓቱ ማግስት ጊዜያዊ ጠ/ሚኒስትርና የውጭ ጉዳይ ሚኒስትር አቶ ሃይለማርያም ደሳለኝ በሰጡት መግለጫ፤ ሁሉም ሰው በቁጭትና በተጨማሪ ብርታት ወደ ስራ እንዲመለስ ማሳሰባቸው የሚታወስ ሲሆን፤ በበርካታ ቦታዎች መደበኛ ስራዎች እየተከናወኑ መሆናቸው ተገልጿል፡፡
ይሁንና በአዲስ አበባና በክልል ከተሞች ውስጥ በሚገኙ የተለያዩ የመንግስት ቢሮዎች፤ ቀጠሮ ተይዞላቸው የነበሩ ጉዳዮች ውሳኔ ሳያገኙ በቀጠሮ እንደተራዘሙባቸው የሚገልፁ ባለጉዳዮች፤ በርካታ ከፍተኛ ባለስልጣናት በቢሮዋቸው እንደማይገኙ ተናግረዋል፡፡
በርካታዎቹ ባለሥልጣናት ሰሞኑን የኢህአዴግ ምክር ቤት ለሚያካሂደው ስብሰባ አዲስ አበባ መግባታቸው የሚታወቅ ሲሆን፤ በዚህ ምክንያት ብዙ ባለስልጣናት በቢሯቸው እንዳይገኙ አንድ ምክንያት ሊሆን ይችላል ተብሏል፡፡ 180 አባላትን የያዘው የኢህአዴግ ምክር ቤት የእድገትና የትራንስፎርሜሽን እቅዱን በተመለከተ ውይይት እንዲካሄድ፤ የፅሁፍ ሰነዶች ተዘጋጅተው ለሁሉም የአመራር አባላት እንደተሰጠ ምንጮች ጠቅሰዋል፡፡ የስብሰባው ዋና አጀንዳ ግን ተተኪ የኢህአዴግ ሊቀመንበርና ምክትል መሰየም ነው ተብሏል፡፡
አራቱ የኢህአዴግ አባል ድርጅቶች እጩ ሊቀመንበር ለምርጫ እንዲያቀርቡ ተጠይቀዋል ያሉት ምንጮች፤ ሦስቱ ድርጅቶች እጩ ማቅረባቸውን ገልፀዋል፡፡ አቶ ሃይለማርያም ደሳለኝ፣ አቶ ግርማ ብሩ፣ እና አቶ ደመቀ በእጩነት እንደቀረቡም ምንጮች ተናግረዋል፡፡ የኢህአዴግ ሊቀመንበር እና ምክትል ሆነው የሚሰየሙ መሪዎች፤ ጠቅላይ ሚኒስትር እና ምክትል እንዲሆኑና ሹመታቸው እንዲፀድቅ ወደ ፓርላማ ይቀርባሉ ተብሏል፡፡
የኢህአዴግ መሪዎች ለስብሰባ ከመጠራታቸው በተጨማሪ፤ ተተኪ ጠቅላይ ሚኒስትር ሳይሾም መቆየቱ የመንግስት ቢሮዎችን ስራ ሳያቀዘቅዝ እንዳልቀረ የተናገሩ ባለጉዳዮች፣ ስብሰባው ሲጠናቀቅና ሹመቶቹ ሲፀድቁ ስራ ይነቃቃል ብለው ተስፋ አድርገዋል፡፡
በሌላ በኩል፤ ከጠ/ሚ መለስ ዜናዊ እረፍትና የቀብር ስነስርዓት በኋላ ያለው ድባብ የቤት አስተዳዳሪ ወይንም አባወራ ሲሞት እንደሚቀዘቅዘው የቤተሰብ ኑሮ ይመስላል በማለት የተናገሩ ባለጉዳዮች፤ ሁኔታው መስተካከል እንዳለበት ይገልፃሉ፡፡



አዲስ አበባ፡- የኢህአዴግ ምክር ቤት ሕዝቡን በማሳተፍ የተጀመረውን ልማታዊና ዴሞክራሲያዊ የሕዳሴ ጉዞ ለማስጠቀል በሚያስችሉ አቅጣጫዎችና ስልቶች ላይ ከስምምነት ላይ ደረሰ።
የኢህአዴግ ምክር ቤት ጽሕፈት ቤት ለዝግጅት ክፍላችን እንዳስታወቀው፤ የሕዳሴውን ጉዞ መላው የግንባሩ አባላትና የትግሉ ደጋፊዎች እንዲሁም የለውጡ ባለቤቶችና ተጠቃሚዎች የሆኑት መላው ኢትዮጵያውያንን በማሣተፍ ማስቀጠል እንደሚገባ ምክር ቤቱ ስምምነት ላይ ደርሷል።
ትናንት የተጀመረው የኢህአዴግ ምክር ቤት ስብሰባ ለታላቁ የድርጅቱ ሊቀመንበር ለክቡር አቶ መለስ ዜናዊ የሕሊና ፀሎት በማድረግ ተከፍቷል። ከአራቱ ብሔራዊ ድርጅቶች በእኩል ድምፅ የሚወከሉት የምክር ቤቱ አባላት ምልዓተ ጉባኤ መሟላት መሠረት በማድረግ ከሕሊና ፀሎቱ በኋላ ለምክር ቤቱ በመወያያነት በቀረቡት አጀንዳዎች ዙሪያ ተወያይቶ በማፅደቅ ሥራውን ጀምሯል። በዚሁ መሠረት በሁለቱ ቀናት ምክር ቤቱ ለመወያየት ከያዛቸው አጀንዳዎች መካከል በቅድሚያ፡-የሚመክረው የልማታዊ ዴሞክራሲያዊ አስተሳሰብ ተግባራዊ ልዕልናን በማረጋገጥ የመለስ/ኢህአዴግን ራዕይ ለማሳካት እንረባረብ በሚል ርዕስ የተዘጋጀና በታላቁ መሪና በድርጅቱ አመራር የተገኙትን ስኬቶች ማስቀጠል በሚቻልባቸውና ቀጣይ ፈተናዎችን ለመቋቋም በሚያስችሉ ጉዳዮች ዙሪያ ነው። ከዚህ በማስቀጠልም ታላቁ መሪ በሕይወት በነበሩበት ጊዜ ተዘጋጅቶ በሥራ አስፈፃሚ ኮሚቴ ውይይት ተደርጎበት የነበረው የአመራር ግንባታና የሕዳሴው ጉዞ በሚል ርዕስ ኪራይ ሰብሳቢነትን ከምንጩ ለማድረቅና የሕዝቡን ዘላቂ ጥቅምና ተጠቃሚነት በሕዝቡ የተደራጀና ቀጣይነት ያለው ንቅናቄና ተሣትፎ ማረጋገጥ ይቻል ዘንድ እና ከዚሁ ሂደት ጠንካራ የድርጅትና መንግሥት አመራር መፍጠር በሚቻልባቸው የአሠራር የአደረጃጀትና የአስተሳሰብ አቅም ግንባታ አቅጣጫዎች ዙሪያ በተዘጋጀ ጽሑፍ ላይ ይመክራል። 
ሦስተኛው አጀንዳ በእነዚህ አጠቃላይ አቅጣጫዎች ተመስርቶ በ2005 በመንግሥት ድርጅት ዘርፍ መከናወን በሚገባቸው የልማትና መልካም አስተዳደር እንዲሁም የፖለቲካና ድርጅት ሥራዎች አጠቃላይ አቅጣጫዎች ዙሪያ የሚመክር ሲሆን፤ በመጨረሻ የታላቁ መሪ የክቡር አቶ መለስ ዜናዊን ሕልፈት ተከትሎ የተፈጠረውን የአመራር ክፍተት የድርጅቱ ሕገ ደንብ በሚያዘው መሠረት ምርጫ በማካሄድ እንደሚሞላ ይጠበቃል።
ምክር ቤቱ ትናንት ቅድሚያ ሰጥቶ በተወያየበት የመጀመሪያው አጀንዳ ዙሪያ በመከረበት ወቅት ከአቶ መለስ ሕልፈት በኋላ በአገራችንና በአካባቢያችን እንዲሁም ከእኛ ሁኔታ ጋር በተያያዙ በሌሎች የዓለም ክፍሎች የተፈጠረውን ሁኔታ በመገምገምና ከዚህም በመነሳት በአገራችን መካሄድና ይበልጥ መጠናከር ያለበትን የልማታዊ ዴሞክራሲያዊ ሥርዓት ግንባታ አጠናክሮ ማስጠቀል በሚቻልባቸው ጉዳዮች ዙሪያ መክሯል። በተጨማሪም የአቶ መለስን ሕልፈት ተከትሎ መላው የአገራችን ሕዝቦችና አፍሪካውያን ወገኖቻችን እንዲሁም ታላላቅ የዓለም ተቋማትና ሀገራት መሪዎች ለታላቁ መሪያችንና በእርሱም አመራርነት በሀገራችን ለተመዘገበው ለውጥ የሰጡትን ታላቅ አክብሮትና እውቅና በማድነቅና ምስጋናውን በማቅረብ ከተሰጠው ምስክርነት ጋርም ለድርጅቱ የተሰጠው አደራ ከፍተኛ መሆኑን ተገንዝቧል። በዚሁ መሠረት መላውን የድርጅቱን አባላትና የትግሉን ደጋፊዎች እንዲሁም የለውጡ ባለቤቶችና ተጠቃሚዎች የሆኑትን መላውን የኢትዮጵያ ሕዝቦችን በማሣተፍ የተጀመረውን ልማታዊና ዴሞክራሲያዊ የሕዳሴ ጉዞ ለማስቀጠል በሚያስችሉ አቅጣጫዎችና ስልቶች ዙሪያ መክሮ ከስምምነት ላይ ደርሷል። ውይይቱ በዛሬው ዕለትም በሌሎች ጭብጦችና አጀንዳዎች ዙሪያ የሚያደርገውን ውይይት ይቀጥላል።
በዚህ የኢህአዴግ ምክር ቤት መደበኛ ስብሰባ የሶማሌ፣ የአፋር፣ የሐረሪ፣ የቤኒሻንጉል ጉምዝና የጋምቤላ ክልሎች አጋር ድርጅቶች ሊቀመናብርትና የየክልሎቹ ፕሬዚዳንቶች በተጋባዥነት ተሣትፈዋል። 

አዲስአበባ፣መስከረም4 2005 (ኤፍቢሲ) ምክር ቤቱ  በመጀመሪያ  ቀኑ  የጉባኤው ውሎ ከጠቅላይ  ሚኒስትር  መለስ ዜናዊ ህልፈት በኋላ በአገራችንና  በአከባቢው እንዲሁም በሌሎች የዓለም ክፍሎች የተፈጠረውን ሁኔታ  ገምግሟል ።

ከዚህ በመነሳትም በአገራችን መካሄድና ይበልጥ መጠናከር ያለበትን የልማታዊ ዲሞክራሲያዊ ስርዓት  ግንባታን አጠናክሮ ማስቀጠል በሚቻልባቸው ጉዳዮች ዙሪያ ዛሬ መክሯል ።


መላውን የድርጅቱን አባላትና የትግሉን ደጋፊዎች እንዲሁም የለውጡ ባለቤቶች እና ተጠቃሚዎች የሆኑትን መላውን የኢትዮጵያ ህዝቦችን በማሳተፍ የተጀመረውን ልማታዊና ዲሞክራሲያዊ የህዳሴ ጉዞ ለማስቀጠል በሚያስችሉ አቅጣጫዎችና ስልቶች  ዙሪያም በመወያየት ከስምምነት ደርሷል ።

የኢትዮጵያ ሕዝቦች አብዮታዊ ዴሞክራሲያዊ ግንባር /ኢህአዴግ/ ምክር ቤት እስከ ነገ  በሚቆየው ስብሰባ የድርጅቱን ሊቀመንበር ይሰይማል።

በዕድገትና ትራንስፎርሜሽን ዕቅድ አፈፃፀም ዙሪያ ያካሄደውን አጭር ግምገማና የ2005 ዓ.ም የትኩረት አቅጣጫዎች የሚመለከት ሰነድ በመመርመር ውሳኔዎችን ያሳልፋል ተብሎ እንደሚጠበቅ ታውቋል።

ምክር ቤቱ በአቶ መለስ ዜናዊ አመራርና በድርጅቱ የተጀመረውን የኢትዮጵያ ህዳሴ አጠናክሮ ለማስቀጠል የድርጅቱን የአመራር ግንባታ በተመለከተ የተዘጋጀውን ሰነድ በመመርመር መሰረታዊ አቅጣጫዎችን እንደሚያመላክትም የምክር ቤቱ ፅህፈት ቤት  ለፋና ብሮድካሲትንግ ኮርፖሬት በላከው መግለጫ ላይ ጠቅሷል ።

የኢሕአዴግ ምክር ቤት ከአራቱ አባል ድርጅቶች በእኩል የተሰየሙ 180 አባላት ያሉት ሲሆን በሁለት ጉባዔዎች መካከል የግንባሩ ከፍተኛ የሥልጣን አካል ሆኖ ያገለግላል ።