POWr Social Media Icons

Thursday, August 23, 2012


የሲዳማ ክልል ጥያቄን ኣንግቦ በተቀጣጠለው ህዝባዊ ንቅናቄ ህዝብን በመንግስት ላይ በማነሳሳት በምል ሃዋሳ ከተማን ጭምሮ በተለያዩ የሲዳማ ወረዳዎች በመንግስት የጸጥታ ኃይሎች ይካሄድ የነበረው ግለሰቦችን የማሰር እንቅስቃሴ ጋብ ብሏል።

በኣለፉት ሶስት ሳምንታት ውስጥ ከሃምሳ በላይ የሚሆኑ ግለሰቦች መታሰራቸው የሚታወስ ሲሆን፤ ከታሰሩት ማካከል ካላ ብርሃኑ ሀንካራን ጨምሮ በዚህ ሳምንት መጀመሪያ ሃዋሳ ከተማ ከምገኘው ፍርድ ቤት የቀረቡ ወደ ኣስር የሚሆኑ ግለሰቦች ቀጠሮ ተሰጥቷቸው ወደ ማረሚያ ቤት ተመልሰዋል።

ይህ በእንዲህ እንዳለ የቀድሞ ጠቅላይ ሚኒስትር ኣቶ መለስ ዜናዊን ይተካሉ ተብሎ የሚጠበቁት የኣገሪቱ ምክትም ጠቅላይ ሚኒስትር እና የውጭ ጉዳይ ሚኒስትር ኣቶ ኃይለማርያም ደሳለኝ በሲዳማ የክልል ጥያቄን በተመለከተ በምኖራቸው ኣቋም ላይ የተለያዩ ኣስተያዬቶች እየተሰጡ ነው።

ያነጋገርናቸው ካላ ደመቀ ዳንጋሞ እና ቤላሞ ባሻ የሃዋሣ ከተማ ነዋሪዎች እንደምሉት ከሆነ፤ ኣቶ ኃይለማርያም ደሳለኝ ከሲዳማ ህዝብ ጋር የኖሩና ሲዳማን ህዝብ ጠንቅቀው የሚያውቁ በመሆናቸው ለክልል ጥያቄው ኣዎንታዊ ምላሽ ልሰጡ ይችላሉ።

ይህንን ኣስተያየት የተቃረኑት ካላ ኣስፋ ላላንጎ እና ካላ ናኦራ ቡኤ በበኩላቸው፤ ኣቶ ኃይለማርያም ካለፉት ኣስር ዓመታት ጀምሮ ጸረ ሲዳማ ኣቋም ያላቸው እና ከኣስር ኣመታት በፊት በርካታ ሲዳማዎች በመንግስት የጸጥታ ኃይሎች እንዲገደሉ ካደረጉት የደቡብ ክልል ባላስልጣናት መካከል ኣንዱ በመሆናቸው የክልል ጥያቄውን በተመለከት የሚኖራቸው ኣቋም ኣዎንታዊ ልሆን ኣይችልም ብለዋል።

ክቡራን የብሎጋችን ኣንባቢያን የሲዳማ ክልል ጥያቄ እና የወደፊት እጣ ፋንታ በተመለከተ ያላችሁን ኣስተያየት በሚከተለው ኣድራሻ ላኩልን፦nomonanoto@gmail.com   

በጠቅላይ ሚኒስትር መለስ ዜናዊ ሞት ምክንያት በኢትዮጵያ የሥልጣን ሳይሆን የአመራር ብቃት ክፍተት ሊያጋጥም እንደሚችል አንድ የኢትዮጵያ የፖለቲካ ጉዳዮች ተንታኝ አስታወቁ ። በአለም አቀፉ የፀጥታ ጉዳዮች ጥናት ተቋም አጥኚ ዶክተር መሐሪ ታደለ ለዶቼቬለ እንደተናገሩት በመለስ አለመኖር አገሪቱ የሥልጣን ክፍተት አያጋጥማትም እስካሁን የመረጋጋት ችግር እልታየባትምም ፣ወደፊት ግን የአመራር ብቃት ክፍተት ሊኖር ይችላል ። በፖለቲካው መስክ የሚታዩ ችግሮችን ለመፍታት ደግሞ ገዥው ፓርቲ የምክክር ና የስምምነት መድረኮችን ማዘጋጀቱ ጠቃሚ ይሆናል ብለዋል ።
ላለፊት 21 አመታት ኢትዮጵያን በፕሬዝዳንትነትና በጠቅላይ ሚኒስትርነት ከመሩት ከአቶ መለስ ዜናዊ ህልፈት በኋላ የገዥው ፓርቲ የኢህአዲግ አመራር እንዴት ይቀጥላል ? ኢትዮጵያስ ከመለስ በኋላ ከአለም አቀፉ ማህበረሰብ የምታገኘው ድጋፍና የሚኖራት ተቀባይነት ምን ይሆናል ? መለስስ በምን ይታወሳሉ የሚሉትና የመሳሰሉት ጥያቄዎች ማነጋገራቸውን ቀጥለዋል ። በአለምአቀፍ የፀጥታ ጉዳዮች ጥናት ተቋም ተመራማሪ ዶክተር መሐሪ ታደለ ጠቅላይ ሚኒስትሩ በአመራር ዘመናቸው በኤኮኖሚና ማህበራዊ መስኮች ለኢትዮጵያ አዳዲስ ውጤቶች ማሰገኘታቸው ይጠቅሳሉ ።

በፖለቲካው መስክ ግን ጠቅላይ ሚኒስትሩ ይከተሉት የነበረው መርህ ብዙ ችግሮችና ቅሬታዎች ያስከተሉ እንደነበር ዶክተር መሐሪ ገልፀዋል ።
ይም ሆኖ ሃገሪቱ መሠረታዊ እንቅስቃሴ ውስጥ እንድትገባ ያደረጉ ጠቅላይ ሚኒስትር ነበሩ ብለዋል ። ከእንግዲህ በኋላስ የሚለው ሌላው ጥያቄአችን ነበር ። ዶክተር መሃሪ እንደሚሉት በተለይ አቶ መለስ ጥሩ አመራር ሰጥተው ውጤት አሳይተዋል ባሉት የኢኮኖሚ መስክ የታዩ ለውጦችን መቀጠል ከባድ ፈተና መሆኑን ይገልፃሉ ።
በፖለቲካ መስክ ደግሞ አሁን ያሉትን መርሆዎች ሰፋ አድርጎ ከተለያዩ ጉዳዩ ከሚመለከታቸው ፖለቲከኞችና የፖለቲካ ፓርቲዎች ጋር ገዥው ፓርቲ የምክክርና የውይይት መድረክን ቢያዘጋጅ ጠቃሚ መሆኑን ነው ዶክተር መሃሪ የተናገሩት ።
የኢትዮጵያ ተቃዋሚዎች የስርአቱ አመራር ሃገሪቱን በብቃት ለመምራት አልቻለም ፤ ህዝቡን በድህነትና በግጭት እያሰቃየ ነውና የአሁኑን አጋጣሚ ለለውጥ እንጠቀምበት ህዝቦችን የሚያሳትፍ ስርዓት ያስፈልጋል በማለት ላይ ናቸው ።
ዶክተር መሐሪ ምንም እንኳን የፖለቲካው መድረክ ጠባብ ቢሆንም ጨርሶ ግን የተዘጋ አይደለም ብለዋል ። እንደ ዶክተር መሐሪ ያንን የፖለቲካ መድረክ ማስፋትና የተሻለ ዲሞክራሲያዊ ስርዓት መገንባት የተቃዋሚዎችም የገዥው ፓርቲም ሃላፊነት ነው ። ይህን ተግባራዊ ለማድረግ ግን መቻቻል ያስፈልጋል ብለዋል ።
ባለፉት 2 ወራት ጠቅላይ ሚኒስትሩ ባልነበሩበት በአገሪቱ ያለመረጋጋት ችግር እንዳልታየ የተናገሩት ዶክተር መሐሪ ወደፊት የሥልጣን ሽኩቻ ካልተፈጠረ በስተቀር ተረጋግታ ትቀጥላለች ብለው እንደሚያምኑ ገልፀዋል ። ከዚህ ሌላ እንደ ርሳቸው አሁን የሥልጣን ክፍተት ባያጋጥምም የአመራር ብቃት ክፍተት ግን ሊኖር ይችላል ።
ኢትዮጵያ ከአቶ መለስ ሞት በኋላ ከአለም ዓቀፉ ማህበረሰብ ጋር ያላት ግንኙነትና የምታገኘው ድጋፍ እንዴት እንደሚቀጥል የተጠየቁት ዶክተር መሐሪ ፥ ሃገሪቱ ከአለም አቀፉ ማህበረሰብ የምታገኘው ድጋፍ ፣ በአካባቢው በሚኖራት ሚናና በህዝቧ ብዛት እንዲሁም በስልታዊ ጠቀሜታዋ ና አሸባሪነትን በመዋጋቷ ላይ የተመሰረተ በመሆኑ ይቀጥላል ብለዋል ።
ሂሩት መለሰ
ነጋሽ መሐመድ


የደቡብ ብሔሮች ብሔረሰቦችና ህዝቦች ክልል መንግስት ኢትዮጵያንና ህዝቦቿን ከድህነትና ኋላቀርነት ለማላቀቅ ደከመኝ ሰለቸኝ ሳይሉ በቅንነትና በታማኝነት አገራቸውን አገልግለው ከፍተኛ የለውጥ ተስፋ ያሳዩትን ክቡር ጠቅላይ ሚኒስትር መለስ ዜናዊ ሕልፈተ ህይወት የሰማነው በታላቅ ድንጋጤና መሪር ሐዘን ነው፡፡

ክቡር ጠቅላይ ሚኒስትር መለስ ዜናዊ አምባገነኑን የደርግ ስርዓት ለማስወገድ በተደረገው ትግል በመታገልና በማታገል ለሀገራችን ለውጥ ታላቅ አስተዋጽኦ ያበረከቱ ታላቅ መሪ ነበሩ፡፡ እንዲሁም ሀገራችን የህገ መንግስት ባለቤት እንድትሆንና በህገ መንግስቱና በህገ መንግስታዊ ስርዓቱ መሰረት ጠንካራ መንግስት እንዲኖራት ለማድረግ የታገሉ ግንባር ቀደም መሪያችን ነበሩ፡፡

ክቡር ጠቅላይ ሚኒስትር መለስ ዜናዊ በሀገራችን ለተመዘገበው እድገት መሰረት የሆኑ ፖሊሲዎችንና ስትራቴጂዎችን ነደፈው ተግባራዊ እንዲደረግ ግንባር ቀደም ሚና የተጫወቱና በነዚህ ፖሊሲዎችና ስትራቴጂዎች አማካኝነት ለተመዘገበው እድገት ከፍተኛ አስተዋጽኦ የነበራቸው መሪም ነበሩ፡፡

ክቡር ጠቅላይ ሚኒስትር መለስ ዜናዊ ብሔር ብሔረሰቦችና ህዝቦች ራሳቸውን እንዲያስተዳድሩ፣ የፌዴራል ስርዓት እውን እንዲሆን ላደረጉት ከፍተኛ አስተዋጽኦ፣ ዛሬ የክልላችንና የሀገራችን ብሔር ብሔረሰቦችና ሕዝቦች ለተጎናፀፏቸው ራስን በራስ የማስተዳደርና በልማት አስተዋጿቸው ልክ የመጠቀም አቅጣጫ ከፍተኛ አስተዋጽኦ የነበራቸው መሪያችን በመሆናቸው የክልላችን ብሔር ብሔረሰቦችና ህዝቦች የዝንተ ዓለም ባለውለታ ናቸው፡፡

ክቡር ጠቅላይ ሚኒስትር መለስ ዜናዊ በሀገራችን ብቻ ሳይሆን በአፍሪካና በአለም አቀፍ ደረጃ የተለያዩ ችግር ፈቺ ሐሳቦችን በማመንጨትና በማፍለቅ ሀገራችንና አህጉራችን በአለም አቀፍ ደረጃ ከፍተኛ ተደማጭነት እንዲኖራቸው ግንባር ቀደም መሪነትን የተጫወቱ በሳል መሪ ነበሩ፡፡

በመጨረሻም በክቡር ጠቅላይ ሚኒስትር መለስ ዜናዊና በመንግስታችን አመራር የተጀመሩ የልማትና የዴሞክራሲ ስርዓት ግንባታ ውጥኖችን ዳር ለማድረስ የክልላችን መንግስትና ሕዝብ ከምን ጊዜውም በላቀ ቁርጠኝነትና ተነሳሽነት የምንፈጽም መሆኑን እያረጋገጥን ለመላው የሀገራችን ፣ የክልላችን ህዝቦች እንዲሁም ለቤተሰቦቻቸው መጽናናትን እንመኛለን፡፡
http://www.ertagov.com/amerta/erta-news-archive/49-erta-tv-hot-news-addis-ababa-ethiopia/2290-2012-08-21-18-34-16.html


አዲስ አበባ፣ ነሃሴ 17፣ 2004 (ኤፍ ቢ ሲ) የኢትዮጵያ ኦርቶዶክስ ተዋህዶ ቤተክርስቲያን ፓትርያሪክ ብፁዕ ወቅዱስ አቡነ ጳውሎስ የቀብር ስነ ስርዓት ዛሬ በቅድስት ስላሴ ካቴድራል ተፈፀመ ።
በቀብር ስነ ሰርዓቱ ላይ  ተጠባባቂ  ጠቅላይ ሚኒስትር ሀይለማሪያም ደሳለኝን ጨምሮ ሚኒስትሮች ፣  የተለያዩ አገራት አብያተ ከርስቲያናት መሪዎች ፣ አምባሳደሮችና  በሺዎች የሚቆጠሩ  የእምነቱ ተከታዮች ተገኝተዋል ።
በስነ ስርዓቱ ላይ  አቶ ሀይለማሪያም ብፁዕ  ወቅዱስ አቡነ ጳውሎስ አገሪቱን ከድህነት ለማላቀቅ በተደረገው ጥረት ከፍተኛ ተሳታፊ የነበሩ አባት ናቸው ብለዋል ።
በቤተ ክርስቲያኗም ሆነ በአገሪቱ በተከናወኑ የልማት ስራዎች ከነበራቸው ተሳትፎ ባለፈ በዓለም አብያተ ክርስቲያናት  ዘንድ ያላቸውን ተሰሚነት በመጠቀም የአገራቸውን  በጎ ገፅታ ያሳወቁ ብልህ አባት ነበሩ ሲሉም ገልጸዋቸዋል።
የአቡነ ጳውሎስን የበጎ አድራጎት ተግባር ተሳትፎን  ያስታወሱት አቶ ሀይለማሪያም ፥ በኤች አይ ቪ /ኤድስ ወላጆቻቸውን ያጡ ህፃናትን በመደገፉ እንዲሁም የቫይረሱን ስርጭት በመከላከሉ ረገድ ያከናወኗቸው ስራዎች የሚያስመሰግናቸው ነው ብለዋል ።
የዓለም አብያተ ክስርስቲያናት ምክር ቤት ፀሃፊ በበኩላቸው የምክር ቤቱ ፕሬዚዳንት የነበሩት ብፁዕ ወቅዱስ አቡነ  ጳውሎስ ለዓለም ሰላም የሰሩና የአመራር ብቃታቸውንም ብዙዎች አርዓያ የሚያደርጉት መሆኑን ተናግረዋል ።
በ76 ዓመታቸው ከዚህ ዓለም በሞት የተለዩት አቡነ ጳውሎስ ከ1985 ዓመተ መህረት ጀምሮ የኢትዮጵያ  ኦርቶዶክስ ተዋህዶ ቤተክርስቲያን አምስተኛ ፓትሪያሪክ  ሆነው ሲያገለግሉ ቆይተዋል ።
በ1999 ዓመተ ምህረት በብራዚል በተካሄደው የዓለም አብያተ ክርስቲያናት ምክር ቤት ጉባኤ ላይም የምክር ቤቱ ሰባተኛ ፕሬዚዳንት ሆነው ተመርጠዋል ።
ቅዱስነታቸው በህይወት ቆይታቸው በኢትዮጵያ  ኦርቶዶክስ ተዋህዶ ቤተክርስቲያን በኩል የግብረ ሰናይ ተግባራትን ፈፅመዋል።
በተለይም በጦርነትና  በድርቅ የተፈናቀሉ  ኢትዮጵያውያንን መልሶ በማቋቋሙ ረገድ የነበራቸው ሚና ከፍተኛ ነበር ።
ለአፍሪካውያን  ችግሮች  አፍሪካዊ  መፍትሄ  መፈለግ በሚል  መርህም  ብፁዕነታቸው  ወደ  ሱዳን በማቅናት  ለዳርፉር ግጭት ሰላማዊ መፍትሄ ለማምጣት ሰርተዋል።
ቅዱስነታቸው ከሃምሌ 5 ቀን 2004 ዓ.ም ጀምሮ 20ኛ አመት በአለ ሲመታቸውን ሲያከብሩ ቆይተዋል።

የወረዳው ፍርድ ቤት ፕሬዚዳንት አቶ ወንድሙ ቂጤሶ እንደገለተጹት  በተጠናቀቀው በጀት አመት ጽህፈት ቤቱ ከቀረቡለት 1ሺህ 4 መቶ 11 የክስ መዛግብት ውስጥ 1 ሺ 3 መቶ 90 ዎቹ ውሣኔ መሰጠቱንና ቀሪዎቹ 21 መዛግብት ደግሞ ለቀጣዩ አመት ማስተላለፉን ተናግራል፡፡
ፍትህ ለህብረተሰቡ ተደራሽ ከማድረግ አንፃር የአመቱነ አፈፃፀም 98 ነጥብ 5 ከመቶ ማድረሱን ጠቅሰው፤ ለቀጣዩ አመት መቶ በመቶ ለማድረስ ጠንክረው እየሰሩ አንደሚገኙ አስረድተዋል፡፡
አርሶ አደሩ ከልማት ሥራው ሣይለይ ፍተህ በአከባቢው ያገኘ ዘንድ በተቋቋሙ 4 ማዕከላት ፍትህ በመስጠት አበረታች ውጤት የተመዘገበ መሆኑን የተናገሩት ፕሬዝዳንቱ በአዲስ አመት ወደ 6 ለማሣደግ ታቅዶ እየተሠራ እንደሆነ ጠቁመዋል፡፡
አርሶ አደሩ በህገ ወጥ ደላላዎች ይገጥመው የነበረውን የግንዛቤ እጥረት ለመቅረፍ ጧት ከችሎት በፊት በባለሙያዎች ትምህርት እየተሰጠ እንዳለ ገልፀዋል፡፡የመንግስት ኮሚኒኬሽን ጉዳዮች ጽህፈት ቤት እንደገለጸው፡፡


ጽህፈት ቤቱ በአመቱ ለመሰብሰብ ያቀደው 6 ሚሊዮን ብር ሲሆን  ከ9 ነጥብ 6 ሚሊዮን ብር በላይ ሊሰበሰበብ መቻሉን የወረዳው ገቢዎች ባለስልጣን ቅርንጫፍ ጽህፈት ቤት ኃላፊ አቶ ምስራቅ በቴ ገልፀዋል፡፡የአመቱ እቅድ ክንውን አፈፃፀም 98 ነጥብ 2 ከመቶ መሆኑንና ካለፈው አመት ተመሳሳይ ወቅት ጋር ሲነፃፀርም የ3 ሚሊዮን 61ዐ ሺህ 196 ብር ብልጫ ማሳየቱን ኃላፊው አስረድተዋል፡፡
ገቢው ሊሰበሰብ የቻለው ከቀጥተኛና ቀጥተኛ ካልሆኑ ገቢዎች እንዲሁም ከልዩ ልዩ ገቢዎች መሆኑን አብራርተዋል፡፡ለገቢው መጨመር የግብር ከፋዩ ህብረተሰብ ግብር የመክፈል ግንበዛቤ እያደገ መምጣት፣ የጽህፈት ቤቱ ሠራተኞች የሥራ ተነሳሽነት መፈጠርና የወረዳው መስተዳደርና ባለድርሻ አካላት ከገቢ ሰብሳቢው ጽህፈት ቤት ጋር የተቀናጀ ሥራ በማከናወናቸው መሆኑን ኃላፊው ጠቁመዋል፡፡
በቀጣይ አዳዲስ የገቢ ምንጮችን በማፈላለግ የተጀመረውን የ5 ዓመት የእድገትና ትራንስፎርሜሽን እቅድ ስኬት በቁርጠኝነት እንደሚሠሩ አቶ ምስራቅ መናገራቸውን የወረዳው የመንግስት ኮሚኒኬሽን ጉዳዮች ጽህፈት ቤት ዘግቧል፡፡
 አዋሳ ነሐሴ 17/2004 በደቡብ ክልል የሚገኙ የተለያዩ መስሪያ ቤቶችና ተቋማት አመራር አባላትና ሰራተኞች በክቡር ጠቅላይ ሚኒስትር መለስ ዜናዊ ሞት የተሰማቸዉን ጥልቅ ሀዘን እየገለጹ ነዉ ።
የደቡብ ክልል ሲቪል ሰርቪስ ቢሮ፣የክልሉ ማረሚያ ቤቶች አስተዳደር ፣የኦሞ ማይክሮ ፋይናንስ ተቋምና የሃዋሳ ዩኒቨርሲቲ አመራሮች፣ሠራተኞች፣ መምህራንና ተማሪዎች በታላቁ መሪያችን ሞት ጥልቅና መሪር ሀዘን ተሰምቶናል ብለዋል ።
ቢሮዎቹና ተቋማቱ ባስተላለፉት የሀዘን መግለጫ ላይ እንዳስታወቁ ክቡር ጠቅላይ ሚኒስትር መለስ ዜናዊ ከወጣትነት እድሜያቸዉ ጀምሮ እስከ እለተ ሞታቸው የኢትዮጵያ ህዝብ ከድህነት ተላቆ በእድገትና ብልጽግና ጎዳና እንዲጓዝ ታላቅ ራእይ ሰንቀዉ የተነሱ ቆራጥና አስተዋይ መሪ ነበሩ ብለዋል ።
የየቢሮዎችና የተቋማቱ ሰራተኞች ጠቅላይ ሚኒስትር መለስ የአመራር ጥበባቸውን በመጠቀም ኢትዮጵያን በልማት ለማሳደግ ደከመኝ ሰለቸኝ ሳይሉ አሁን ለደረሰንበት የልማት፣ የመልካም አስተዳደርና የዲሞክራሲ ስርዓት ያበቁ ታታሪና ብልህ መሪ እንደነበሩ አስታዉቀዋል ።
ክቡር ጠቅላይ ሚኒስትር መለስ ዜናዊ "ለመጪው ትውልድ ዕድገት፣ ብልፅግናና ልማትን እንጂ ድህነትን አናወርስም "በማለት በቆራጥነትና በታላቅ ኃላፊነት መንፈስ ሲሰሩ የቆዩ የለውጥ ሐዋሪያ ናቸው ሲሉ የሃዋሳ ዩኒቨርሲቲ ፕሬዜዳንት ገልፀዋል፡፡
በጠቅላይ ሚኒስትር መለስ ኢትዮጵያ በአለም ከምትታወቅበት የተመፅዋችነትና የረሃብ ታሪክ እንድትላቀቅ በዓለም ትልቅ የልማት ተስፋ ሆነው ከሚታዩ የዓለም አገራት ተርታ እንድትሰለፍ ያደረጉ ጀግናና በሳል መሪ ነበሩ ብለዋል፡፡
ዩኒቨርሲቲው የእርሳቸዉን በጎ ተግባር በመከተል ብቃት ያለው የልማት ሠራዊት መሆን የሚችል በሁሉም መስክ የሰለጠነ የሰው ኃይል በብዛትና በጥራት በማፍራት የድርሻውን እንደሚወጣም አስታውቀዋል፡፡
የዩኒቨርሲቲው ተማሪዎችና ሠራተኞች በበኩላቸዉ በታላቁ መሪያችን ድንገተኛ ሞት ብንጎዳም እርሳቸው በቀየሱት የሰላም፣ የልማትና የዲሞክራሲ ስርዓት የተገገኙ ውጤቶችን በማስቀጠል በእርሳቸዉ ስራ እንድንኮራና እንድጽናና እንሆናል ብለዋል ፡፡
ክቡር ጠቅላይ ሚኒስተር መለስ ዜናዊ ለሀገራችን ብቻ ሳይሆን የአፍርካ ህዝቦች ታላቅ ተስፋ የነበሩ በዓለም አቀፍ ደረጃም ብቃታቸውን ያስመሰከሩ ብልህና አርቆ አስተዋይ የአፍርካ መሪ ነበር ሲሉ የክልሉ ሲቨል ሰርቪስ ቢሮ አመራርና ሠራተኞች አስታዉቀዋል ።
እርሳቸዉ የጀመሯቸው የልማት ውጥኖች ከግብ እንዲደርሱ ጠንክረን እንሰራለን፣ አባይ ይገደባል ፣መለስ ለዘላለም ሲታወስ ይኖራል በማለትለእርሳቸዉ ያለቸዉን ጽኑ ፍቅር አረጋገጥዋል ።፡
በተመሳሳይ የክልሉ ማረሚያ ቤቶች አስተዳደር አመራርና ሠራተኞች ክቡር ጠቅላይ ሚኒስትር ለህዝቦች ደህንነት፣ ለዜጎች እኩልነትና ለሰብአዊ መብት መጠበቅ እንዲሁም ለህግ የበላይነት መረጋገጥ ሌት ከቀን ሲተጉ የነበሩ ታላቅና አኩሪ መሪያችን ነበሩ ሲሉ ገልጠዋል ።
የክቡር ጠቅላይ ሚኒስትራችን ሞት የተሰማን ሀዘን ክልክ ያለፈና መራራ ቢሆንም እሳቸው የጀመሩትን የሰላም፣ የልማትን የዲሞክራሲ ስርዓት ግንባታ ስራዎችን አጠናክረን እንቀጥላለን ሲሉ ተናግረዋል፡፡
የክልሉ ኦሞ ማይክሮ ፋይናንስ ተቋም ማኔጅመንትና ሠራተኞች በበኩላቸዉ ባለራዕዩ መሪያችን ያስቀመጡትን የአምስት አመቱን የዕድገትና ትራንስፎርሜሽን ዕቅድ ለማሳካትና የእርሳቸውን ራዕይ ዕውን ለማድረግ የአገራችን ህዳሴ ጉዞ ለማፋጠን ጠንክረን እንሰራለን ብለዋል ።