POWr Social Media Icons

Saturday, June 30, 2012


ከአስር ዓመታት በፊት “ሲዳማ ክልል ሁና ትደራጅ” የሚል ጥያቄ በማቅረባቸው በአንድ ቀን ውስጥ ከ60 በላይ የሆኑ የአዋሳ ከተማ ነዋሪዎች በአጋዚ ጦር በግፍ ተጨፈጨፉ፤ በመቶዎች የሚቆጠሩ ለአካል ጉዳቶች ተዳረጉ፤ በርካቶች ታሰሩ። ከሰባት ዓመታት በፊት ደግሞ  - በምርጫ 97 ማግሥት – “ድምፃችን ይከበር” በማለታቸው እስካሁን ቁጥራቸው በትክክል የማይታወቅ የአዋሳ ወጣቶች ተገደሉ፤ በርካታ ወጣቶችና አዛውንት ታሰሩ፣ ተደበደቡ፣ ተጋዙ።

ዛሬም አዋሳ በውጥረት ውስጥ ነች።

የመለስ ዜናዊ ዘረኛ አገዛዝ ሠራዊት እንደለመደው የአዋሳን እና የአካባቢው ነዋሪዎች ሊገድል፣ ሊያቆስል፣ ሊያስር ዘምቷል። ከአዋሳ ወጣ ብላ በምትገኘው አለታ ጭኮ የመለስ ዜናዊ ፓሊሶች ነዋሪዎችን ገድለዋል፤ በርካቶችን አቁስለዋል። ነዋሪዎችም በፓሊሶች ለደረሰባቸው ጥቃት በወሰዱት የመከላከል እርምጃ አንድ ፓሊስ ሕይወቱን አጥቷል። የሚሰማቸው ጆሮ አላገኙም እንጂ ሕዝብን ከሕዝብ በማጣላት ሙያ የተካኑት  የመለስ ካድሬዎች “አዋሳ ከተማ ወደ ፌደራል ትጠቃለል  ያሉት ወላይታዎች ናቸው” እያሉ በማስወራት ላይ ናቸው።

መለስ ዜናዊ የፈጠረው ዘርን ብቻ መሠረት ያደረገው “ፌደራሊዝም” በማር የተለወሰ መርዝ መሆኑ ባለፉት ሃያ ዓመታት በተግባር ያየነው ጉዳይ ነው። የመለስ ዜናዊ የውሸት ፌደራሊዝም ከሁሉም የአገራችን ክፍሎች በባሰ የተሳለቀበት “የደቡብ ብሄር፣ ብሄረሰቦችና ሕዝቦች ክልላዊ መንግሥት” በሚባለው የአገራችን ክፍል ነው። አዋሳ ደግሞ የዚህ የአቅጣጫ ስያሜ የተሰጠው “መንግሥት” መቀመጫ ናት። አዋሳ እና እሷ የምትወክለው “የደቡብ ብሄር፣ ብሄረሰቦችና ሕዝቦች ክልላዊ መንግሥት” የመለስ ዜናዊ ፌደራሊዝም አስከፊ ገጽታ ማሳያዎች ናቸው። በመለስ ዜናዊ ፌደራሊዝም ምክንያት ውቧ አዋሳ የግጭቶች ማዕከል ሆናለች።

ይሁን እንጂ የአዋሳም ሆነ ሌሎች የክልሉ ነዋሪዎች የመለስ ዜናዊን ዘረኛ አደረጃጀት እና ዘረኛ አገዛዝ ተቀብለው አያውቁም።  መምህር የኔሰው ገብሬ ኅዳር 4 ቀን 2004 ዓ.ም

“በደል በዛ!!! ፍትህ በሌለበት አገር መኖር አልችም!!! በዚህ ሁኔታ መኖር ኑሮ አይባልም!!! ግፍና መከራ እያየሁ መኖር አልችልም!!!”

ብሎ  በራሱ ላይ ቤንዚን አርከፍክፎ  የተሰዋባት ዋካ የምትገኘው በዚሁ ክልል በዳውሮ ዞን መሆኑ ማስታወሱ ብቻውን የክልሉ ሕዝብ ለመለስ ዜናዊ አገዛዝ ያለው የተቃዉሞ  መጠን ገላጭ ነው። ከዚህም በተጨማሪ የአዋሳና የአርባ ምንጭ ተደጋጋሚ ሕዝባዊ አመፆች እና የቤንች ማጂ ዞን ነዋሪዎች የከርሰ ምድር ሃብታቸውን ለወያኔ ባለሃብቶች ላለመስጠት በማድረግ ላይ ያሉት ትንንቅ በአብነት ማንሳት ይቻላል። ደቡብ፣ በ1997 ምርጫ ወቅት የወያኔ ካድሬዎች እግራቸውን ማሳረፊያ ያጡበት ክልል እንደነበር ማስታወሱም ይጠቅማል።

በምርጫ 97 ወዲህ የመለስ ዜናዊ ዘረኛ አገዛዝ “በደቡብ” እግሩን ለመትከል በብርቱ ጥሯል፤ በተወሰነ መጠንም ጥረቱ ፍሬ አፍርቷል። ጥቅም እስካገኙ ድረስ ስለ ፍትህ፣ ነፃነት፣ እኩልነትና ዲሞክራሲ ደንታ የሌላቸው፤ የራሳቸውን የቤተሰብ አባላት ሳይቀር ለእርድ ለማቅረብ የማይሰቀጥጣቸው  አድርባዮችን ‘ከደቡብ” መመልመል ችሏል።  እነዚህ ወራዳ የመለስ ምልምሎች ናቸው የአዋሳን እና የአካባቢውን ሕዝብ እርስ በርስ በማጣላት የሕዝቡን ፀረ-ወያኔ የትግል ትኩረት አቅጣጫ ለማስቀየር ተግተው ውሸቶችን እያሰራጩ ያሉት።

ይሁን እንጂ ከቀድሞው በባሰ  ዛሬ ሲዳማው በወያኔ መሠሪ ተንኮል ተቆጥቷል። ወላይታውም የዚያኑ ያህል በወያኔ መሠሪ ተንኮል ተቆጥቷል። ሃድያው፣ ጉራጌው፣ ጋሞው፣ ከምባታው፣ ስልጢው፣ ሃመሩ፣ ሙርሲው ….  “ደቡብ” በተባለ ቋት ውስጥ የገቡት የውዲቷና የዉቧ አገራች ልጆች በሙሉ በወያኔ ላይ ተንኮል ተቆጥተዋል። እናም የመለስ ዜናዊ ሎሌዎችሕዝብን ከሕዝብ ጋር ለማጣላት የሚደርጉት መሯሯጥ እነሱ የሚፈልጉትን ውጤት አያመጣም። ወያኔ በደቡብ የቆሰቆሰው እሳት መጥፊያው እንደሚሆን ምልክቶች እየታዩ  ነው።

ግንቦት7: የፍትህ፣ የነፃነትና የዲሞክራሲ ንቅናቄ፣ ወያኔ “የደቡብ ብሄር፣ ብሄረሰቦችና ሕዝቦች ክልላዊ መንግሥት” እያለ በሚጠራው የአገራችን ክልል ውስጥ የሚገኙ ኢትዮጵያዊያን ሁሉ በትግራዩ ገዢ ጉጅሌ መሠሪ ተንኮል ሳቢያ ዓይናቸውን ከዋነኛ ጠላታቸው ወያኔ ላይ እንዳይነቅሉ በጥብቅ ያሳስባል።

የኢትዮጵያዊያን ሁሉ የጋራ ጠላት የመለስ ዜናዊ ዘረኛ አገዛዝ ነው። ይህ ዘረኛ አገዛዝ ከተወገደ  ችግሮቻችንን ሁሉ በምክክር መፍታት እንችላለን። ስለሆነም ዛሬ ትኩረታችን ሁሉ ወያኔ የጫነብንን ዘረኛ አገዛዝ አስወግደን ፍትህ፣ ነፃነትና ዲሞክራሲ የሰፈኑባት ኢትዮጵያን መፍጠር ነው።

መምህር የኔሰው ገብሬን ጨምሮ በርካታ የክልሉ ነዋሪዎች የተሰውት ስለኢትዮጵያና ኢትዮጵያዊነት፤ ከዚያም አልፎ ስለ ሰው ልጅ ነፃነት መሆኑ ለአፍታም አንዘነጋም።

ወያኔ በአዋሳና አካባቢዋ ነዋሪዎች ላይ የቆሰቆሰው እሳት የራሱ የወያኔ መጥፊያው እንዲሆን ለማድረግ ተግተን እንድንሠራ ግንቦት 7 ጥሪ ያደርጋል።

በዚህ አጋጣሚም በእነዚህና መሰል ግጭቶት ሳቢያ ለሚጠፋው እያንዳንዱ የሰው ሕይወት በመለስ ዜናዊ የሚመራው የትግራይ ገዥ ጉጅሌ በኃላፊት የሚጠየቅ መሆኑን ግንቦት 7 በጥብቅ ያስገነዝባል።

ድል ለኢትዮጵያ ሕዝብ!!!
http://www.ginbot7.org


ሰኔ ፳፫ (ሃያ ሶስት) ቀን ፳፻፬ ዓ/ም

ኢሳት ዜና:-የዩኒቨርስቲ ተማሪዎች፣  የግብርና ሰራተኞች፣ መምህራን፣ የክልሉ ፖሊስ ተወካዮች፣ የምክር ቤት አባላትና  እና ሌሎችም ከ 300 በላይ የሚሆኑ ወጣቶች ዛሬ በአዋሳ ከተማ በህቡእ ተሰባስበው የሲዳማ ወጣቶች ንቅናቄ የሚል ድርጅት መስረተዋል። በጉባኤው ላይ ከ22 ወረዳዎች የተውጣጡ የተለያዩ ብሄር ብሄረሰቦች የተወከሉ ወጣቶች የተገኙ ሲሆን፣ የትግል ስትራቴጂያቸውን እና አላማቸውን ለተሰብሳቢው ይፋ አድርገዋል።

በከፍተኛ ሚስጢር በተካሄደው ጉባኤ ላይ የወጣቱ አመራሮች የሲዳማ ህዝብ ማንነቱን ለማረጋገጥ የሚያደረገውን ትግል ወጣቶቹ ወደ ፊት ለመግፋት መወሰናቸውን የገለጡ ሲሆን ፣ የመጨረሻ ግባቸው ኢትዮጵያን አሁን ከገባችበት ፈተና ለማላቀቅ ትግል ማድረግ መሆኑን ገልጠዋል።

የወጣቶቹ አመራሮች የተለያዩ ብሄረሰብ ተወካዮችን ለመጥራት የተገደዱትም አላማቸው አካባቢያዊ ሳይሆን ብሄራዊ አጀንዳ ያለው መሆኑን ለማሳየት ነው ብለዋል።

በጉባኤው ላይ የወላይታ ተወካይ ” እኛ ወንድማማች ህዝብ ነን፤ ኢትዮጵያዊነታችን ይበልጣል፣ ሀይለማርያም ደሳለኝ በሰራው ስህተት ወላይታ በሙሉ በሲዳማ የሚጠላበት እና የምንለያይበት ምክንያት የለም ፣ ሀይለማርያም በምንም አይነት መልኩ ወላይታን አይወክልም፤ ስለዚህ በእርሱ አይን ባታዩን፣ አብረን ብንሰራ ይህችን አገር እናሳድጋለን፣ ከገባችብት ችግር እናወጣለን” ብሎአል።

የንቅናቄው አመራሮች “የእኛ ትግል የብሄር ጥያቄ አይደለም ፤ የአማራ፣ የኦሮሞ፣ እና የሌሎች ብሄርና ብሄረሰቦችን ተወካዮችን የጋበዝነውም አላማችን ብሄራዊ መሆኑን ለማሳየት ነው፣ አሁን የሲዳማን ጥያቄ አንስተናል ትግላችን ግን በዚህ አያቆምም፣ አብረን ለኢትዮጵያ ነጻነት እንታገላለን” የሚል መልስ ሰጥተዋል።

አንድ ሌላ ተወካይ ደግሞ ” መንግስት የዚህን እንቅስቃሴ ዱካ ቢደርስበት ሃላፊነቱን ማን ይወስዳል” በማለት የጠየቀ ሲሆን፣ የንቅናቄው ተወካዮች  የንቅናቄው ደህንነት በእያንዳንዱ አባል ላይ መውደቁን ተናግረዋል። የክልሉ ፕሬዚዳንት የሆኑት አቶ ሽፈራው ሽጉጤ የሲዳማን ተወላጆች ከሌላው ህዝብ ጋር ለማጋጨት የሚናገሩት ንግግር ፣ የሲዳማን ህዝብ እንደማይወክል የንቅናቄው አመራሮች ተናግረዋል።

ከእንግዲህ ወደ ሁዋላ እንደማይመለሱ የገለጡት ወጣቶች፣ የሌሎች አካባቢ ወጣቶችም እንዲቀላቀሉዋቸው ጥሪ አቅርበዋል።

ወጣቶቹ የገዢውን ፓርቲ የደህንነት መረብ አልፈው ይህን ያክል ወጣቶችን ለመሰብሰብ መቻላቸው ታዳሚውን አስገርሟል። በተለይ የፖሊስ አባላትና የመንግስት ከፍተኛ ባለስልጣናት ለወጣቶች እንቅስቃሴ ድጋፍ መስጠታቸውና ወጣቶቹ ለአገራቸው ያላቸው ፍቅር ና ለለውጥ ያላቸው ፍላጎት ከፍተኛ መሆን ንቅናቄው በአጭር ጊዜ ውስጥ አስፈሪ ሀይል ሆኖ እንዲወጣ እንደሚያስቸለው በጉባኤው የተሳተፈው የኢሳት ዘጋቢ ገልጧል።

ጉባኤው በስነምግባራቸውና በችሎታቸው በወጣቱ ዘንድ ከበሬታ ያላቸውን ሰዎች በአመራርነት መርጧል። ለንቅናቄው ደህንነትና ዘላቂ ህልውና ሲባል የጉባኤውን መሪዎች ስም እና ጉባኤው የተካሄደበትን ቦታ ከመግለጥ እንቆጠባለን።

በመጨረሻም በክልሉ በሚገኙ ወረዳዎች ሁሉ የሚበተን ፍላየር ለጉባኤተኛው ታድሎ ጉባኤው ተጠናቋል።

በሌላ ዜና ደግሞ በሲዳማ ዞን በጭኮ ወረዳ የተነሳውን ብጥብጥ ተከትሎ የታሰሩት 15 ሰዎች ተፈቱ። አቃቢ ህግ ግለሰቦችን ከግንቦት7 ጋር በተያያዘ የከሰሳቸው ቢሆንም፣ ለፍርድ ቤቱ ማስረጃ ማቅረብ ሳይችል ቀርቷል። ዘጋቢያችን እንዳለው አቃቢ ህግ ማስረጃ የለኝም በሚል ሰበብ እስረኞቹ እንዲፈቱ ያደረገው መንግስት ከጎሳ መሪዎች ጋር ከተነገጋረ በሁዋላ ነው ። ኢሳት ባላፈው ሳምንት እንደዘገበው የጭኮ ከተማ ህዝብ በፌደራል ፖሊስ አባላት ጉዳት ከደረሰበት በሁዋላ የከተማው ነዋሪ አፊኒ እየተባለ በሚጠራው ባህላዊ ስነስርአት አማካኝነት፣ ወደ ፊት ስለሚወስደው እርምጃ ከጎሳ መሪዎች ጋር ለማነጋገር ወደገጠር አምርቶ ነበር።  የመንግስት ባለስልጣናትም በተመሳሳይ መንገድ ወደ ገጠር በመውረድ የጎሳ መሪዎች ተቃዋሚዎችን እንዲመክሩዋቸው ጠይቀዋል። የጎሳ መሪዎች ና የሁሉም ቀበሌዎች አርሶአደሮች “ከእኛ ጋር ከመነጋገራችሁ በፊት ሁሉም እስረኞችን ፍቱ” የሚል ቅድመ ሁኔታ በማስቀመጣቸው፣ እሰረኞቹ ተፈትተዋል።
http://www.ethsat.com/