POWr Social Media Icons

Saturday, February 11, 2012



ሀዋሳ ፤የካቲት 03 2004 /ዋኢማ/ - በሀዋሳ ከተማ በማህበራት የተደራጁ ወጣቶች የሀዋሳ ሀይቅን ከብክለትና ከደለል የመከላከል ሥራዎችን በማከናወን ላይ እንደሚገኙ የከተማው ማዘጋጃ ቤት አስታወቀ፡፡
በማዘጋጃ ቤቱ የአካባቢ ጥበቃ መምሪያ ሃላፊ አቶ ተፈራ ባንቶ ለዋልታ ኢንፎርሜሽን ማዕከል እንዳስታወቁት የሀዋሳ ሀይቅን ከብክለትና ከደለል የመከላከል ሥራዎችን በማከናወን ላይ የሚገኙት በ20 የአካባቢ ጥበቃና ጽዳት ማህበራት የተደራጁ 378 ወጣቶች ናቸው ፡፡
ወጣቶቹ በሀይቁ ዙሪያ የሚገኙ ደላሎችን ለመከላከል በሐይቁ የተፋሰስ መሬቶች ዙሪያ 16 ኪሎ ሜትር የጎርፍ መቀልበሻ ቦዮችን እና የዝናብ ውሃን ወደ መሬት ለማስረግ የሚያስችሉ 57 የጨረቃ እርከኖችን መገንባታቸውን ሃላፊው አስረድተዋል፡፡
እንዲሁም የአካባቢውን ሥነ ምህዳር ከመጠበቅ በተጨማሪ ለውበት ለጥላና ለመናፈሻ አገልግሎት ሊውሉ የሚችሉ ከ92 ሺህ በላይ የአገር በቀል እና የባህር ማዶ ችግኞችን መትከላቸውን አመልክተዋል፡፡
በማህበር ተደራጅተው በእንቅስቃሴ ላይ የሚገኙት ወጣቶች ቀደም ሲል ሥራ አጥ እና በተለያዩ ሱሶች የተጠመዱ እንደነበሩ ያስታወሱት ሃላፊው በአሁኑ ወቅት ግን ለራሳቸው ከፈጠሩት የሥራ ዕድል በተጨማሪ ለሀዋሳ ሐይቅ እና ለከተማው አካባቢ ጥበቃ ሥራ ከፍተኛ አስተዋፅኦ እያበረከቱ እንደሚገኙ ተናግረዋል፡፡
የከተማው ማዘጋጃ ቤትም ወጣቶቹ እያከናወኑ የሚገኙት ሥራ አርአያነት ያለው ተግባር መሆኑን ከገመገመ በኋላ በየወሩ ለማህበራቱ አባላት የደሞዝ ክፍያ የሚውል የ150 ሺህ ብር ድጋፍ እያደረገ እንደሚገኝ ከሃላፊው ገለጻ ለመረዳት ተችሏል፡፡




አዲስ አበባ, የካቲት 3 ቀን 2004 (አዲስ አበባ) - ሐዋሳ ዩኒቨርስቲ የማኀበረሰብ ተኮር ሬዲዮ ጣቢያ ለመክፈት የሚያስችለውን ፈቃድ ወሰደ፡፡
የዩኒቨርሲቲው የኮርፖሬት ኮሙኒኬሽን ማርኬቲንግ ዳይሬክተር የሕዝብ ግንኙነት ከፍተኛ ባለሙያ አቶ ዳዊት በዳሳ ለኢ ዜ አ እንዳስታወቁት ዩኒቨርሲቲው ፈቃዱን ያገኘው ባቀረባቸው ምክረ ሃሳብ /ፕሮፖዛል/ ከሌሎች ዩኒቨርሲቲዎች ጋር ተወዳድሮ በማሸነፉ ነው፡፡
በፈቃዱ ከኢትዮጵያ ብሮድካስት ባለሥልጣን አስፈላጊ መስፈርት መሟላታቸው ከተረጋገጠ በኋላ ዩኒቨርሲቲው በኤፍ ኤም 90 ነ ጥብ 9 የአየር ሞገድ ፕሮግራሞችን ማቅረብ ይጀምራል ብለዋል፡፡
የዩኒቨርሲቲው ፕሬዚዳንት ዶክተር ዮሴፍ ማሞ በበኩላቸው ዩኒቨርሲቲው ባሉት አራት ካምፓሶች በአሁኑ ወቅት ከ24 ሺህ በላይ ተማሪዎችን በመደበኛና በተከታታይ ፕሮግራሞች እስከ ዶክትሬት ዲግሪ ባሉት ደረጃዎች እያስተማረ መሆኑን ተናግረዋል፡፡
እንዲሁም በይርጋለም ከተማ ላይ ግንባታው በመፋጠን ላይ በሚገኘው ካምፓስ ከመጪው ዓመት ጀምሮ ተማሪዎችን እንደሚቀበል ገልጸዋል፡፡
በአሁኑ ወቅትም 120 የሚሆኑ በተለያዩ ርዕሰ ጉዳዮች ላይ ችግር ፈቺና አሳታፊ የምርምር ሥራዎች በዩኒቨርስቲው ሥር በመካሄድ ላይ የሚገኙ ሲሆን የሬዲዮ ጣቢያው መከፈት ከፍተኛ ሚና እንደሚኖረው ፕሬዚዳንቱ አስረድተዋል፡፡
በመሆኑም የዩኒቨርሲቲው የማኀበረሰብ አገልግሎት ከማጠናከር በተጨማሪ፤ የቴክኖሎጂ ሽግግር ለመፍጠር የሚደረገውን ጥረት ለማጠናከር ሬዲዮውን በዋናነት ለመጠቀም መዘጋጀቱን አስታውቀዋል፡፡
ሬዲዮ ጣቢያውን ለመክፈት የሚያስችለውን ወጪ በኢትዮጵያ የአሜሪካን ኤምባሲ የተሸፈነ ሲሆን፣ ከአንድ ወር በኋላ ለሐዋሳ ከተማና አካባቢው ማኀበረሰብ ሥርጭት እንደሚጀምር መግለጻቸውን ኢዜአ ዘግቧል ፡፡