Nomonanoto Show

Saturday, January 14, 2012

የሲዳማ ዞን ከፍተኛ ፍርድ ቤት ፕሬዚዳንት አቶ ግርማ ጉዬ በበኩላቸው በስራቸው በሚገኙ 19 ወረዳዎችና ሀዋሳን ጨምሮ በሁለት የከተማ አስተዳደሮች አዲሱ የለውጥ አሰራር ተግባራዊ ተደርጓል
ሃዋሳ, ጥር 5 ቀን 2004 (ሃዋሳ) - በደቡብ ክልል የፍትህ አገልግሎት አሰጣጥን ለማጎልበትና ለማጠናከር የተጀመረው የለውጥ አሰራር መሻሻል ማምጣቱን አስፈፃሚ መስሪያ ቤቶችና ባለጉዳዮች ገለጹ፡፡
ዘንድሮ በክልሉ ከ1 ነጥብ 2 ሚሊዮን ለሚበልጡ ሰዎች የህግ ግንዛቤ የሚያሳድግ ትምህርት እንደሚሰጥም ተመልክቷል፡፡
የክልሉ ፍትህ ቢሮ የህዝብ ግንኙነት መምሪያ ኃላፊ ኮሎኔል እንዳሻው ስመኖ ትናንት ለኢትዮጵያ ዜና አገልግሎት እንደገለጹት የመሰረታዊ የስራ ሂደት ለውጥ ተከትሎ የመጣው አዲሱ የውጤት ተኮር የምዘና ስርዓት ፕሮግራም በክልሉ ከፍተኛ ለውጥ አምጥቷል፡፡
በዚህም ቀደም ሲል ፍርድ ቤቶች፣ ዐቃቢያነ ህግ፣ ማረሚያ ቤቶችና ፖሊስ በተናጠል የሚያካሄዱትን የተበታተነ አሰራር በማስወገድ በአንድ ላይ ተቀናጅተው እንዲሰሩ ተደርጓል ብለዋል፡፡
በተለይ የምርመራና የክስ፣ የህግ ጥናት ረቂቅ ዝግጅትና ግንዛቤ መፍጠር፣ የጠበቆችና ሲቪክ ማህበራት ፍቃድ ውልና ምዝገባ ክትትል ከተገኙት ለውጦች መካከል የሚጠቀሱ መሆናቸውን አመልከተዋል፡፡
በዚህም የፍትህ አገልግሎት አሰጣጡን ቀልጣፋና ለህብረተሰቡ ተደራሽ በማድረግ ቀደም ሲል ከስድስት ወር በላይ የሚፈጀው አሁን በሰዓታት፣ በቀናት ቢበዛ እስከ አንድ ወር ባለው ጊዜ ውሳኔ እያገኙ ናቸው ብለዋል፡፡
ከወንጀልና ከፍትሃብሄር ክሶች ጋር ተያይዞ ንፁሃን እንዳይጎዱና አጥፊዎች እንዳያመልጡ የተቀመጠው ግብም ውጤታማ መሆኑን ተናግረዋል፡፡
የፍትህ አካላቱ ተቀናጅተው መስራታቸው ፈጣን ፍትህ ለተጠቃሚው ለመስጠት ትልቅ አቅም መፍጠሩን አስረድተዋል፡፡
እንዲሁም በአዲሱ አሰራር ከሶስት ዓመት በታች የሚያሳስሩ መለስተኛ የወንጀል ድርጊቶች በእርቅ እንዲፈቱ የተጀመረው ፕሮግራም ህብረተሰቡ ከልማት ስራዎቹ እንዳይገታ፣ አላስፈለላጊ የመዝገብ ክምችት እንዳይኖርና የፈፃሚዎችን ጊዜ ለመቆጠብ ማስቻሉን ጠቁመዋል፡፡
ፍትህን ተደራሽ ከማድረግ አኳያ በተለይ ቀደም ሲል የነበረው የተዘዋዋሪ ችሎት ወደ ምድብ ችሎት በመቀየር እስከ ወረዳና ቀበሌ ድረስ ተደራጅተው አፋጣኝ ውሳኔና ምላሽ በመስጠት ህብረተሰቡ ተጠቃሚ መሆኑን አስረድተዋል፡፡
የሲዳማ ዞን ከፍተኛ ፍርድ ቤት ፕሬዚዳንት አቶ ግርማ ጉዬ በበኩላቸው በስራቸው በሚገኙ 19 ወረዳዎችና ሀዋሳን ጨምሮ በሁለት የከተማ አስተዳደሮች አዲሱ የለውጥ አሰራር ተግባራዊ ተደርጓል ብለዋል፡፡
ቀልጣፋ የፍትህ አገልግሎትን ለህብረተሰቡ ተደራሽ ለማድረግ ተጨማሪ ምድብ ችሎቶች በአለታ ወንዶና በይርጋዓለም ዳሌ ተዘዋዋሪ ችሎት በመክፈት የመዝገብ ክምችቶችና ውጣ ውረዶችን መቀነስ መቻሉን ገልጸዋል፡፡
በሲዳማ ዞን ከፍተኛ ፍርድ ቤትና በሀዋሳ የመጀመሪያ ደረጃ ፍርድ ቤት ከተገኙት ባለጉዳዮች መካከል አንዳንዶቹ በሰጡት አስተያየት የፍርድ ቤቶቹ አገልግሎት አሰጣጥ ከቀድሞው ጋር ሲነጻጸር የተሻለ ነው፡፡
በተጨማሪም በክልሉ ዘንድሮ የህብረተሰቡን የህግ ግንዛቤ ለማሳደግ ከ1 ነጥብ 2 ሚሊዮን በላይ ሰዎች የተለያዩ የብዙሃን መገናኛ ዘዴዎችን በመጠቀም ትምህርት ለመስጠት እንቅስቃሴ መጀመሩን የክልሉ ፍትህ ቢሮ ህዝብ ግንኙነት ኃላፊ አመልክተዋል፡፡
ይህም ዜጎች ሰብዓዊና ዴሞክራሲያዊ መብታቸው ተከብሮላቸው ግዴታቸውን እንዲወጡ፣ የፍትህ ስርዓቱ እንዲጎለብትና እንዲጠናከር የህብረተሰቡ ተሳትፎና ግንዛቤ ወሳኝ ሚና እንዳለውም ጨምረው ገልጸዋል፡፡


አዋሳ, ጥር 5 ቀን 2004 (ሃዋሳ) - በሀዋሳ ከተማ በ200 ሚልዮን ብር የተገነቡ አንድ ሺህ 675 የጋራ መኖሪያና ንግድ ቤቶች ዛሬ ተመዝግበው ለሚጠባበቁና ቅድመ ክፍያ ላጠናቀቁ ግለሰቦች በእጣ ተላለፈ፡፡
መንግስት ባመቻቸው የቤቶች ልማት የመኖሪያ ቤት ባለቤት በመሆናቸው መደሰታቸውንም ተጠቃሚዎች ገልጸዋል፡፡
በሀዋሳ ከተማ አራት አካባቢ ተገንብተው በእጣ ለነዋሪዎች ከተላለፉት የጋራ መኖሪያ ቤቶች መካከል አንድ 575 የጋራ መኖሪያ ቤቶች ቀሪዎቹ 100 የንግድ ቤቶች መሆናቸውን የከተማው ከንቲባ አቶ ዮናስ የሱፍ በዕጣው ስነ ስርዓት ላይ አስታውቀዋል፡፡
ሶስት ደረጃ ያላቸው የጋራ መኖሪያ ቤቶች መንግስት የተጠቃሚዎችን የመክፈል አቅም በማየት ያደረገውን ከፍተኛ ድጎማና ድጋፍ ሳይጨምር ከንግድ ቤቶቹ ጋር 200 ሚልዮን ብር ወጪ መደረጉን ገልጸዋል፡፡
የተቀናጀ የቤቶች ፕሮግራም በከተሞች ልማት ስራ ውስጥ ለቤቶች ልማት ልዩ ትኩረት የህብረተሰቡን የመክፈል አቅም የሚመጥን የቤት ልማት ስራ በማከናወን የመጠለያ ችግርን መቅረፍ፣ የቁጠባ ባህልን በማዳበር ሰፊ የስራ ዕድልና የቴክኖሎጂ ሽግግር በመፍጠር በኩል ጉልህ ሚና እንደሚጫወት ተናግረዋል፡፡
በከተማው ቀደም ሲልም የአንድ ሺህ 648 የጋራ መኖሪያና ንግድ ቤቶች ለተጠቃሚዎች መተላለፋቸውን ገልጸው ግንባታቸው 95 በመቶ የተጠናቀቀና ዕጣ የወጣላቸው 1 ሺህ 575 የጋራ መኖሪያ ቤቶች መጋቢት 15/ 2004 ለባለዕድሎች እንደሚተላለፉ አስረድተዋል፡፡
ፕሮጀክቱ ለበርካታ ዜጎች የስራ ዕድል በመፍጠር ስራ አጥነትን የመቅረፍ አላማ እንዳለው ገልጸው በእስካሁኑ ሂደት ለ5ሺህ 985 ዜጎች የስራ እድል መፍጠሩን አስታውቀዋል፡፡
የደቡብ ክልል ቤቶች ልማት ኤጄንሲ ዋና ስራ አስኪያ አቶ ወንድሙ ሴታ ሀዋሳን ጨምሮ በክልሉ ዘጠኝ ከተሞች በከፍተኛ የመንግስት ድጎማና ወጪ የተጠናቀቁ 4 ሺህ 884 ቤቶች ለተጠቃሚዎች መተላለፋቸውን ጠቁመው በግንባታ ላይ የሚገኙ 3 ሺህ 280 የጋራ መኖሪያ ቤቶችን እስከ መጋቢት 2004 በማጠናቀቅ ለተጠቃሚው ለማስተላለፍ ጥረት እየተደረገ ነው ብለዋል፡፡
በሀዋሳ ከተማ ሲዳማ ባህል አዳራሽ ዛሬ ዕጣ ከደረሳቸው ግለሰቦች መካከል አንዳንዶቹ በግለሰብ ቤት ይደርስባቸው የነበረው ስቃይና ችግር በቤቶች ልማት ተቃሎ የቤት ባለቤት ለመሆን በመቻላቸው መደሰታቸውን ገልጸዋል፡፡
እጣ ያልደረሳቸው ግለሰቦች የዕጣ አወጣጥ ስነ ስርዓቱ ከሌላው ጊዜ በተሻለ ሁኔታ ግልፅና ፍትሃዊ መሆኑን ጠቁመው በቀጣይም የቤቶች ልማት አሁን የጀመረውን ስራ አስፋፍቶና አጠናክሮ እንዲቀጥል ጠይቀዋል፡፡